Pontevedra será o centro do piragüismo nacional co Campionato de España de maratón

Presentación do campionato

Pontevedra será o centro do piragüismo nacional o sábado e o domingo co Campionato de España de maratón que se disputará no río Lérez. Acudirán á cita case 800 padexeiros de 137 clubs. Os galegos parten como favoritos nas modalidades máis importantes. O campionato será valedoiro para clasificarse para o Campionato do Mundo e de Europa do presente ano. Tamén como ensaio xeral para o europeo que se disputará no mesmo escenario en 2016.

É unha das citas máis importantes da tempada, tanto polo número de participantes como polo valor do mesmo. Así quedou reflectido no acto de presentación realizado no Concello de Pontevedra. Miguel Anxo Fernández Lores, o alcalde, resaltou que “a vinculación da cidade co piragüismo é moi importante. Este campionato volverá demostrar a capacidade de organización que temos aquí. E tamén é de agradecer a aposta que realizar a Federación Galega de Piragüismo”.

Agustín Fernández, concelleiro de deportes, referiuse nos mesmos termos ao acontecemento deportivo. Engadiu que “contamos cun escenario espectacular, como é o río Lérez. Pero ademais serviranos para facer un traballo previo para o Campionato de Europa do próximo ano, no que colocaremos a Pontevedra no centro de interese deportivo internacional”.

Alfredo Bea, presidente da Federación Galega de Piragüismo, resaltou que “sempre hai que agradecer este tipo de acordos e colaboración. Estamos seguros que continuarán no futuro”. O Concello de Pontevedra e o ente federativo asinaron un acordo de colaboración no que se inclúe o Campionato de España de maratón, o próximo fin de semana, a Copa de España de 500 e 200 metros, e o Campionato de España de pista que se disputarán en Verducido.

Alfredo Bea reiterou que “o Campionato de Europa de 2016 é moi importante polo que representa. Pero o noso obxectivo é que en Verducido tamén se poida disputar unha proba de carácter internacional. Ese é un desafío polo que imos traballar”.

No Campionato de España de maratón haberá unha ampla representación galega. O As Torres Romaría Viquinga e a Cidade de Pontevedra serán os clubs que presenten máis padeeiros. Á competición tamén acudirán Iván Alonso, Ramón Ferro, Óscar Graña ou Tono Campos, favoritos nas súas modalidades de canoa e kaiak.

As regatas iniciaranse tanto o sábado como o domingo ao nove da mañá. A categoría sénior de kaiak terá que afrontar un percorrido de 29,800 quilómetros e sete porteos. As canoas, de 26,200 metros e seis porteos. O sábado serán as competicións dos barcos individuais e o domingo os dos dobres.