Ponte Caldelas continúa co pavimentado de varios viarios en zonas do rural

O Concello de Ponte Caldelas continúa a execución do plan de obras de pavimentación de viarias, incluído no Plan Provincial de Obras 2015 aprobado pola Deputación de Pontevedra para os municipios da provincia, e que no caso de Ponte Caldelas supera os 200.000 euros de investimento.

As actuacións van dirixidas, a maior parte, a reparacións e melloras en varios viarios de titularidade municipal en varios núcleos rurais do municipio, co obxectivo de mellorar a accesibilidade a vivendas e núcleos de poboación.

Así, invístense 31.000 euros na pavimentación do acceso á Costiña en Caldelas, unha actuación que pavimentará con aglomerado unha parte deste acceso que actualmente está en formigón, excepto na zona de máis pendente.

Unha actuación similar realizarase no camiño central de Tourón, que atravesa o centro do núcleo entre a travesía antiga e o camiño de Os Francos recentemente pavimentado. Nesta actuación e no pavimentado do camiño de Roca de Abaixo se investiron 44.500 euros.

Por outra banda, destínanse 85.500 euros a reforzar o firme de varios camiños de titularidade municipal en varios núcleos de poboación como Pazos, Ramal do Cemiterio de Caldelas e Anceu (Os Casás).

Finalmente, invístense 41.000 euros en mellorar o firme do camiño de O Lombo en Cuñas e dun ramal en Buchabad.

Todas estas actuacións están a ser executadas nos meses de maio e xuño, do mesmo xeito que se fixo o ano pasado no que se investiron 150.000 euros en pavimentacións en varios lugares. O que se pretende é seguir mellorando os accesos a vivendas e núcleos de poboación do Concello de Ponte Caldelas. Por iso destínase a maior parte do investimento deste Plan de Obras da Deputación a reparación de camiños e estradas co fin de manter en perfecto estado a rede de viarias municipais entre núcleos de poboación dos que dispón o municipio pontecaldelano.