Oriol Junyent espera que Sar estea como nas mellores ocasións

O Rio Natura Monbus Obradoiro xogará este fin de semana o penúltimo partido en casa da tempada, ante o Unicaja (domingo, 12.00 horas). O encontro será ademais unha homenaxe a Oriol Junyent, recentemente retirado, cuxo número colgará no teito do Fontes do Sar desde este domingo.

O pivote, xa recuperado tras a emotiva rolda de prensa de despedida celebrada en Sar ante os medios, indica que “día a día sigo recibindo mensaxes de agarimo, mesmo na rúa. Séntome moi agradecido por iso. Desde o momento no que me lesionei, aquí nunca me faltou apoio e é algo que agradezo na alma a todo o mundo”.  Recoñece que aínda que “sempre que se vai alguén hai mostras de agarimo”, cre que foron “moi reais e moi especiais”.

Para este domingo, o club lanzou unha oferta moi especial: as entradas de todo o pavillón valerán 15 euros, lembrando o dorsal do catalán, que será retirado na previa do choque. “Para min é algo moi grande. A outra camiseta retirada é a de Bernard Hopkins, un americano que achegou moitísimo á liga Endesa, e que ademais tiven a fortuna de ter como compañeiro e é tamén unha gran persoa. Bótoo de menos e será unha maneira simbólica de estar ao seu lado para sempre”, explica.

Por último, lembra que á marxe de expectativas persoais, o máis importante “será que o equipo poña a guinda do pastel cunha vitoria”. Por iso, anima a todos os afeccionados a asisitir “e dar ese apoio extra que sempre gardan para cando se necesita. Espero que Sar estea como nas mellores ocasións”, conclúe.