O Rio Natura Monbus Obradoiro visita o Colexio Nosa Señora de Lourdes na Estrada

Visita do Rio Natura Monbus Obradoiro ao centro estradense

O Rio Natura Monbus Obradoiro ao completo asistiu a unha xornada recreativa no Colexio Nosa Señora de Lourdes, situado na Estrada. Alí, tras a presentación realizada polo delegado do club Fran Grela, todos os xogadores e membros do corpo técnico contestaron as preguntas do centenar de nenos presentes. Os máis atrevidos mesmo se lanzaron a facelas en inglés.

Tras a entrega de obsequios por parte dos escolares aos obradoiristas, estes asinaron autógrafos aos presentes, e mesmo puideron revivir en vídeo algún dos mellores momentos da tempada.

A visita tivo tamén un compoñente emotivo especial para o técnico Moncho Fernández e o técnico axudante Víctor Pérez, que nos seus comezos como adestradores dirixiron o club de baloncesto local estradense.