O Real Madrid impón a súa pegada para saír vivo da emboscada do Obradoiro

O Rio Natura Monbus Obradoiro acabou cedendo en Sar ante a calidade do Real Madrid. Os de Moncho Fernández, acompañados en todo momento por unha afección con fe inquebrantable, aguantou os arreóns do líder da liga durante algo máis de vinte minutos, pero sucumbiu ante a explosión de Jaycee Carroll nun terceiro cuarto estratosférico.

O escolta americano volveu lucirse en Santiago, nun escenario que se lle vén dando moi ben nas últimas tempadas. Despois dunha primeira parte na que tivo pouca relevancia, Carroll dinamitou o encontro con doce puntos practicamente consecutivos, cos que tirou por terra o bo traballo dos santiagueses durante dous cuartos.

Con todo, o actor principal foi Gustavo Ayón: 18 puntos e oito rebotes para converterse no pesadelo fundamental do Rio Natura Monbus Obradoiro, con 24 de valoración. O mexicano foi un quebradizo de cabeza constante para os homes interiores de Moncho Fernández, acreditando un excepcional 89% de acerto.

No Rio Natura Monbus, Juanjo Triguero asinou unha das actuacións máis solventes da tempada, referente na pintura durante varios tramos do partido. O pivote foise ata os 17 de valoración, con 12 puntos, e inmaculado nos tiros de campo.

Nos prolegómenos do encontro Terry Porter, lenda da NBA, recibiu o bastón de peregrino, a Compostela, e demais instrumentos necesarios un día antes de arrincar o Camiño de Santiago, na iniciativa solidaria promovida pola súa fundación e a Fundación Heracles.

Co partido en xogo, quen impuxo a súa lei foi Gustavo Ayón. O pivote moveuse como quixo na zona obradoirista, cun gran xogo de costas a canastra, traballando moi ben aos seus defensores. Doce puntos no primeiro cuarto aos que o Madrid engadiu a inspiración de KC Rivers, para pór a primeira gran renda no marcador. O americano cravou dous triplos rematando boas triangulacións dos homes de Laso, que en todo momento souberon facer uso do extrapass para xerar vantaxes e superar o armazón defensivo obradoirista.

Pola súa banda, o Rio Natura Monbus Obradoiro viviu da experiencia de Triguero, apoiado pola agresividade de Corbacho e Waczynski. Os tiradores, incapaces de atopar fortuna de lonxe, atacaron a zona e puxeron en pé ao público despois dun reverso magnífico de Adam. O Madrid, desde o triplo, cimentou a primeira das súas escapadas (17-25).

O combinado de Moncho Fernández mellorou moito a súa versión defensiva no segundo cuarto. O equipo da capital empezou a ter problemas á hora de xerar xogo en ataque, fiando a anotación aos tiros libres. O Rio Natura Monbus ofreceu a súa mellor versión, con Pepe Pozas na sala de máquinas. Kleber posterizou a Bourousis, e Pumprla e Miller abusaron do aro para pór o partido nun pano (35-38).

Creu Sar nunha nova xesta dos gladiadores obradoiristas. O Rio Natura Monbus conseguira levar ao seu terreo a contenda, cun ritmo máis trabado que impediu ao Real Madrid explotar a súa principal virtude: os contraataques.

Durante os primeiros minutos do terceiro cuarto continuou a melloría progresiva dos de Moncho Fernández, que chegaron mesmo a selar as táboas. Foi entón cando reapareceu Gustavo Ayón, anulado durante bastantes minutos por Jesús Chagoyen, e a versión máis explosiva de Jaycee Carroll. Desde a liña de persoal, en suspensión e tamén de tres: o repertorio do escolta é moi extenso, e unha vez máis en Sar volveu exhibir todo o seu potencial.

Mentres, o Rio Natura Monbus Obradoiro, despois de acumular varios ataques imprecisos, tratou de reaccionar coas penetracións de Pepe Pozas, combinando ben con Corbacho (47-65). Tamén as perdas dos galegos foron decisivas á hora de inclinar o partido cara á capital.

Co partido practicamente decantado, foi momento de servir espectáculo á afección. Fíxoo por unha banda Nankivil, finalizando unha soberbia contra entre Giannopoulos e Pozas, e tamén Marcus Slaughter, un habitual á hora de levantar aos afeccionados das súas butacas. Os santiagueses atoparon fluidez co acerto de Cárdenas e Giannopoluos, pero a distancia era insalvable.

Laso quixo dar minutos a Luka Doncic, xoia da coroa da canteira do Real Madrid. Despois de debutar o xoves contra o Unicaja, o novísimo xogador merengue luciu desenvoltura e foi aplaudido polo Fontes do Sar, por unha afección que volveu ser protagonista. Nin sequera co seu equipo perdendo por 20 puntos deixou de animar o público aos seus, e despedíronlles postos en pé alentándolles para as próximas batallas.

En sete días o Rio Natura Monbus Obradoiro repite en Santiago, recibindo ao Unicaja de Málaga. Un partido que será moi especial para todo o obradoirismo, no que se renderá homenaxe a Oriol Junyent. O eterno capitán poderá recibir a calor da súa afección, nunha mañá na que se retirará a súa camiseta, que presidirá o Fontes do Sar desde as alturas, á beira da doutro histórico: Bernard Hopkins.