O PSOE de Vigo pide unha cara a cara entre Abel Caballero e Feijóo

O PSOE de Vigo pediu unha ‘cara a cara’ entre o seu candidato, Abel Caballero, e o presidente da Xunta e do PP galego, Alberto Núñez Feijóo, porque “é o único debate que interesa á cidade”, e desprezou á candidata popular, Elena Muñoz, porque “non ten nada que achegar” e é “unha total descoñecida”.

Así de contundente foi a coordinadora de campaña dos socialistas de Vigo, Carmela Silva, quen instou a celebración dese “gran debate”, nun “medio local” da cidade olívica, “entre o único candidato que defendeu Vigo e o político que máis a ataca”. “Que non teña medo, que sexa valente, que dea a cara”, incidiu Silva.

Segundo a coordinadora de campaña, o debate debe producirse con Feijóo porque é “o candidato oculto” do PP. “O señor Feijóo é o que manda, ordena e fai saber ao PP de Vigo, e é o que participa en primeira liña de campaña e o que expón os titulares”, indicou.

Así mesmo, sinalou que a candidata Elena Muñoz é unha “total descoñecida”. “Estivo escondida toda a súa vida, ninguén sabe nada desta señora. O tempo que foi conselleira non a viu por Vigo, tería pavor a que a recoñecesen, pero non debería telo porque é unha total descoñecida”, insistiu Carmela Silva, quen criticou que “cada vez que lle deixan abrir a boca ten unha ocorrencia”.

“CANDIDATO NA SOMBRA”

Silva mostrou a súa convicción de que o presidente da Xunta “prestarase” a ese debate, porque se prestou a ser o candidato na sombra”. Tamén recalcou que “enviou a Vigo a unha candidata que non ten poder, nin capacidade de decisión e é unha auténtica descoñecida”.

Sobre a posibilidade de que Caballero participe noutros debates, propostos por organismos neutrais, como a Asociación da Prensa de Vigo, coa presenza doutros aspirantes á alcaldía, Carmela Silva sinalou que esas formulacións se analizarán unha vez que comece a campaña, pero que “a gran noticia” é que deben verse as caras o alcalde e o xefe do Executivo galego. “Xa lle vaticino ao señor Feijóo que perderá o debate”, sentenciou.