O porto de Vigo recibirá un cruceiro con pasaxe xaponesa nunha volta ao mundo de tres meses

O Porto de Vigo recibirá, por primeira vez na súa historia, a escala dun barco con pasaxe xaponesa. Será mañá sábado, cando unha das embarcacións máis luxosas de Xapón, con turistas procedentes do Lexano Oriente, arribe aos peiraos olívicos. Procedente de Lisboa (Portugal), a súa chegada está prevista ás 06.00 horas. Permanecerá atracado na Estación Marítima ata as 18.00 horas, momento no que porá rumbo a Honfleur (Francia).

A dársena viguesa acollerá así, por primeira vez, a un buque do país asiático, o ‘Asuka II’. Unha embarcación de bandeira xaponesa, coñecida facilmente polas súas luxosas instalacións e o alto prezo que pagan os turistas por viaxar na nave. 

O buque incluirá Vigo na súa viaxe ao redor do mundo, que arrincou o pasado 4 de abril na cidade nipoa de Yokohama e concluirá o próximo 16 de xullo, tras percorrer máis dunha trintena de localizacións. En España, Vigo e Barcelona serán os únicos portos que visite. A bordo, viaxan preto dun milleiro de persoas, entre pasaxe e tripulación. 

Con motivo desta escala inaugural, o Presidente da Autoridade Portuaria de Vigo, Ignacio López-Chaves, visitará mañá o buque, onde participará no tradicional intercambio de placas co Capitán do barco. 

Posicionamento no mercado asiático

Con esta escala, o Porto de Vigo sitúase no potente mercado asiático, especialmente relevante polo elevado consumo que realiza a súa pasaxe ao pisar terra. De feito, se por algo se distingue o ‘Asuka II’ é polas súas luxosas dependencias e o trato personalizado aos seus hóspedes. 

O cruceiro xaponés, propiedade da centenaria naviera ‘NYK Cruises’ (Nippon Yusen Kaisha), -unha das máis grandes que existe- foi construído en 1990 co estilo e a elegancia xaponesa, e entre as súas características técnicas destacan as súas 241 metros de eslora por 30 de manga, cun calado de  8 metros  e de 48.621 GT. 

Considerado como o cruceiro máis luxoso de Xapón, o ‘Asuka II’ ten capacidade para albergar a 872 pasaxeiros e 470 tripulantes. Conta con 2 piscinas, 8 bares, un casino e un centro de fitness. Tamén dispón de teatro, 461 camarotes exteriores -260 deles con balcón privado- e 19 camarotes interiores. Os pasaxeiros deste buque, son na súa maioría de orixe nipón, do mesmo xeito que a súa tripulación.

Construído nos estaleiros xaponeses de Nagasaki baixo en nome de ‘Crystal Harmony’ para a naviera ‘Crystal Cruises’, no ano 2006 foi transferido da flota de ‘Crystal Cruises’ á ‘Nippon Yusen Kaisha’, e entrou en servizo baixo o seu nome actual, ‘Asuka II’. Na actualidade, opera, principalmente, para o mercado nipón.

Cruceiro temático

Tras a escala mañá sábado do ‘Asuka II’, a Ría de Vigo recibirá o domingo ao ‘Seas Cloud II’. Procedente de Leixoes (Portugal), este buque de 117 metros de eslora e 16 de manga, ten previsto fondear fronte ao arquipélago das Illas Cíes, desde onde continuará a súa ruta sobre as 22.00 horas. Durante a súa estancia en Vigo -estará fondeado nove horas- traerá a bordo un total de 93 pasaxeiros, case todos estadounidenses (91 pax.) e 63 tripulantes. 

Esta é a segunda escala dun cruceiro temático ou de aventura que recibirá o arquipélago das Illas Cíes ao longo de 2015, tras a visita, o pasado 9 de maio, do ‘Silver Explorer’.

Aínda que o tamaño destes buques nada ten que ver cos habituais do Porto de Vigo, estes buques caracterízanse polo elevado poder adquisitivo da súa pasaxe, que atopa nas Illas Cíes o seu principal reclamo para escalar na nosa cidade, e desde onde realizan visitas guiadas polo arquipélago.

De 3.849 toneladas de rexistro bruto, o ‘Seas Cloud II’ destaca especialmente por ser, máis que un cruceiro, un veleiro de alto nivel, capaz de despregar 24 velas cunha superficie de 3.400 metros cadrados. Ademais do casco, os mastros deste veleiro están fabricados en aceiro naval de gran resistencia. A guinda -ou altura total do pau maior- mide 61 metros. Co aparello despregado, o ‘Seas Cloud II’ alcanza unha velocidade normal de sete nós, aínda que con ventos constantes e en determinadas condicións de mar pode alcanzar ata os 16 nós.

Ten capacidade para acoller ata 96 pasaxeiros en diferentes categorías de camarotes, e unha tripulación de 63 persoas. Na súa concepción e deseño, os armadores seguiron a liña do histórico ‘Seas Cloud’ e na súa construción investiron 40 millóns de dólares.