O porto de Vigo participará nunha importante feira en materia de loxística en Munich

O Porto de Vigo participará, un ano máis, nunha das feiras máis importantes do mundo en materia de loxística: Transport Logistic 2015, que se celebrará na cidade alemá de Munich entre os días 5 e 8 de maio. E farao xunto a outras Autoridades Portuarias españolas na caseta conxunta de Portos do Estado, baixo o lema “Ports of Spain: Once you’re there, you’re everywhere”.

Transport Logistic 2015 é unha das feiras máis grande e importante de cantas se celebran en Europa no sector loxístico e de transporte. Por iso, e como xa vén sendo habitual, baixo a marca de “Ports of Spain” perséguese, dando imaxe de país e plataforma do sur de Europa, que se consolide a percepción de España como a conexión ideal para atraer non só as mercadorías de import/export entre España e o principal centro neurálxico da economía europea, senón tamén como base para os tránsitos marítimos.

O obxectivo é incrementar os tráficos dos portos españois cos principais portos alemáns, (Hamburgo e Bremen, principalmente) cos que España xa move 2,5 millóns de toneladas, e propiciar que as futuras cadeas loxísticas que partan da Península Ibérica consigan captar aquelas mercadorías en tránsito con orixe/destino aos principais centros de produción e consumo de Europa.

No caso concreto do Porto de Vigo, a delegación desprazada a Munich aproveitará este encontro para presentar as infraestruturas e instalacións viguesas, centrándose sobre todo na promoción dos servizos marítimos regulares existentes no Porto olívico, a fin de identificar sinerxías e potenciais cargas con operadores loxísticos europeos, en especial, transitarios de gran tamaño, como BLG LOGISTICS, D.B. SCHENKER, RHENUS, etc., pero tamén operadores de breakbulk e heavy lift (cargas pesadas e especiais), así como transportistas por estrada de toda Europa, na procura de cargas para a Autoestrada do Mar. Doutra banda, a Terminal de Colectores de Vigo, coa súa última ampliación, os seus servizos e tráficos actuais, será outro dos obxectivos a promocionar que a Autoridade Portuaria de Vigo exponse nesta importante cita.

Promocionar a PLISAN

Así mesmo, a Autoridade Portuaria de Vigo aproveitará esta cita para promocionar a Plataforma Loxística de Salvaterra-As Neves (PLISAN). De feito, o Porto vigués pechou varias reunións con empresas de inmoloxística (logistics real state) nestes catro días. Estas empresas, expertas nas claves e tendencias no mercado da loxística europea, levarán información de primeira man do estado actual da plataforma, opcións de instalación e adquisición de superficie, servizos, cronoloxía da posta a disposición e entrada en funcionamento, etc. É por iso que, tanto o Consorcio da Zona Franca de Vigo como a Xunta de Galicia, a través do Instituto Galego de Vivenda e Chan (IGVS), terán unha presenza notable na caseta e nas reunións, unha das cales levará a cabo fose do recinto feiral, nun evento paralelo organizado por unha prestixiosa consultora europea de servizos no campo da loxística.

Transport Logistic 2015 ten carácter bianual, e nela danse cita as principais compañías e organismos internacionais do sector loxístico e de transporte, xa que na actualidade é unha feira que logrou o status de líder a nivel mundial, tras haber medrado ao longo das décadas. Todo iso é un reflexo da recuperación da industria, xa que se considera que o sector loxístico é sempre o primeiro en percibir e notar as fases de recuperación económica tras unha crise.

A Autoridade Portuaria de Vigo, que xa participou no últimas tres edicións desta feira, acollerá ás empresas de Vigo que se despracen a Munich para darlles asistencia e soporte, da forma habitual neste tipo de eventos.