O estaleiro Barreras traballa en todos os proxectos de Pemex aínda que periga algún pequeno

O presidente do estaleiro de Vigo Hijos de J. Barreras, José García Costas, reiterou este venres que seguen traballando “en todos” os proxectos anunciados por Pemex, aínda que recoñeceu que “periga algún dos pequenos, porque non -van- a ter sitio para facelo”.Así o manifestou en declaracións aos medios durante unha visita ao estaleiro da candidata do Partido Popular á Alcaldía, Elena Muñoz, onde García Costas incidiu en que a empresa segue traballando “en todos” os proxectos de Pemex e, de feito, está “en moitas cousas”.

Tal e como indicou, neses proxectos pequenos nos que non van poder meterse por falta de sitio formúlanse subcontratar, posto que están a intentar incorporar “o que sexa máis rendible” e “pode haber cousas que non interesen”.

Acerca do flotel de Pemex, que actualmente é a única carga de traballo no estaleiro, o presidente de Barreras indicou que na actualidade está a dar traballo a 614 persoas e concretou que a botadura está prevista para o 30 de setembro, aínda que podería haber “un erro dun día”.