O curso “Estratexias cidadáns para os tempos da crise” centrarase en Caión

O curso de verán de arquitectura Estratexias cidadáns para os tempos da crise que se desenvolverá no Concello da Laracha do 31 de agosto ao 4 de setembro foi presentado hoxe no Salón de Plenos polo alcalde, José Manuel López Varela, e polos impulsores desta iniciativa, os profesores da Área de Proxectos Arquitectónicos e Urbanismo da Escola Técnica Superior de Arquitectura da Universidade da Coruña, Cristóbal Crespo e Mónica Mesejo, e a arquitecta Sandra González.

Trátase dun proxecto dirixido a completar a formación académica do alumnado de arquitectura, arquitectura técnica, enxeñerías, socioloxía, humanidades e arte realizando un estudo da realidade urbanística e arquitectónica do Concello da Laracha desde diferentes perspectivas. A finalidade é reflexionar sobre as estratexias a seguir para reconducir a forma e a vida urbanas a partir da situación presente desde os puntos de vista da xestión ambiental e social e da arquitectura.

José Manuel López Varela abriu a quenda de intervencións agradecendo á Escola Técnica Superior de Arquitectura da Universidade da Coruña que pensase no Concello da Laracha para levar a cabo este proxecto, agardando que “os veciños, técnicos e profesionais do sector do urbanismo poidan recoller as ideas e propostas que xurdan do curso para mellorar a nosa paisaxe urbana”.

O alcalde mostrouse tamén satisfeito por contar entre os organizadores do curso con Cristóbal Crespo, “un dos arquitectos que deseñou a piscina municipal da Laracha”, proxecto que naquela época fora “innovador” e que recibira ese recoñecemento obtendo “premios arquitectónicos de relevancia” e mesmo albergando “a rodaxe dunha película e anuncios publicitarios”.

Para o profesor Cristóbal Crespo, por cuestións de carácter económico “o espazo urbano pasou no últimos anos de ser un ben cultural a un ben patrimonial”, o que “fixo dano á mentalidade da xente”. Por iso considera que debe terse conciencia do público para, entre todos, lograr mellorar as vilas, e precisamente a finalidade da iniciativa e aproveitar os coñecementos e o enxeño dos ponentes e dos estudantes para obter ideas que poidan levarse a cabo.

A tamén profesora Mónica Mesejo achegou datos de relevancia sobre o curso, adiantando que a actuación se centrará na vila de Caión e que se dividirá entre a parte teórica (con ponencias a cargo de mestres, expertos e profesionais da arquitectura) e práctica (investigación con traballo de campo e toma de datos in situ). Haberá “entre vinte e trinta alumnos”, pero agárdase a presenza dun maior número de persoas nas ponencias, xa que a asistencia é libre e non require de matrícula previa.

As áreas de traballo estruturaranse en subgrupos que serán formados en base ás características dos alumnos. O resultado do traballo materializarase en paneis e en soportes dixitais, facéndose unha publicación cos mesmos ao remate do curso.

Os profesores da Escola Técnica Superior de Arquitectura da Universidade da Coruña aseguraron que animarán aos estudantes a que a investigación que se realice durante este verán na vila de Caión sexa obxecto do seu traballo de fin de grado.

O prazo de inscrición para participar no curso de verán Estratexias cidadáns para os tempos da crise está aberto desde a xornada de onte. As persoas interesadas en participar ou que desexen ampliar información deben poñerse en contacto coa Escola Técnica Superior de Arquitectura da Universidade da Coruña.