O Concello de Cambre retira os carteis da Barcala das prazas públicas onde se prohibía xogar ao balón

O alcalde de Cambre, Manuel Rivas, deu orde hoxe mesmo de retirar os carteis das prazas públicas da Barcala onde se prohibía xogar ao balón. Rivas explica que a redacción dos carteis non era adecuada e entende que os veciños expresen o seu malestar pola súa colocación. Segundo o primeiro edil, os carteis colocáronse tras varias peticións de veciños da zona que se queixaban das molestias ocasionadas polo ruído e os “balonazos”. Con todo, Rivas indica que a intención era que os máis maiores se desprazasen á pista de “futbito” que se atopa a menos de 70 metros destas prazas na mesma urbanización. E por suposto, asegura, “a ninguén lle cabe na cabeza que os pequenos non poidan xogar cos seus pais ao balón nunha praza pública, o que se quería impedir era que os mozos puidesen dar algún balonazo aos pequenos ou contra as paredes dos edificios, pero non que non xogasen os pequenos”, apunta.