O candidato do BNG en Santiago pretende cobrar IBI á Igrexa por pisos e terreos

O candidato do BNG-Asembleas Abertas á Alcaldía de Santiago comprometeuse a que, se goberna, “declarará” a cidade como “concello libre de desafiuzamentos”, e indicou que fará pagar IBI á Igrexa por inmobles como “pisos, garaxes e terreos”. “Non pedimos nada raro”, dixo, na súa participación nun almorzo informativo organizado por ‘Fórum Europa. Nova Economía’, sobre a reclamación do imposto para a Igrexa. Ao respecto, aclarou que non se trata de facer pagar IBI pola Catedral ou por bens de interese cultural, como tampouco pola cociña económica.

“Non vai por aí”, indicou para explicar, a liña seguida, que a Igrexa tamén ten propiedades como pisos e garaxes ou terreos nos que, nalgúns casos, se desenvolven actividades económicas, polo que resulta mesmo competencia desleal” se non se lles cobra o imposto do IBI como ao resto dos cidadáns.

En canto á declaración da capital galega como “libre de desafiuzamentos”, Rubén Cela esgrimiu que esta actuación se enmarcaría na política social que pretende desenvolver no Concello, e suporía actuacións como “garantir que a Policía Local non interveña” nas execucións xudiciais, por exemplo.

Así mesmo, este compromiso pasa por que “ningunha familia durma a rentes” de chan, para o que se ocuparía de ter unha bolsa de vivendas sociais públicas, e tamén romper relacións con entidades bancarias que non acepten a dación en pagamento.

Segundo recordou na súa intervención inicial, na capital galega hai máis de 22.000 persoas en risco de exclusión social, e máis de 4.000 en situación de risco de pobreza extrema.

A este respecto, Cela incidiu en que “se”debe colaborar cos que peor estano a pasar” e advertiu de que “un concello non pode concibir nunca a caridade como xustiza social”. “A primeira medida será reforzar os servizos sociais e establecer un plan de choque contra a pobreza”, anunciou o candidato do BNG-Asembleas Abertas.

FUSIÓN E POLÍTICA AEROPORTUARIA

Por outro lado, preguntado pola fusión dos concellos, considerou que se trata dunha cuestión que se “aborda con frivolidade e irresponsabilidade”. No caso de Santiago, recoñeceu que hai “unha realidade comarcal ou metropolitana que ninguén discute”, pero considerou “un erro establecer este debate” en clave de fusión.

Así, avogou por que, “o primeiro”, sexa “suprimir deputacións e delegacións de goberno”, así como “ministerios que non teñen competencias” por estar delegadas ás comunidades autónomas. Por outro lado, defendeu “explorar todos os ámbitos de colaboración”.

En materia aeroportuaria, Rubén Cela constatou que se “segue competindo entre nós”, en referencia aos tres aeroportos galegos. A este respecto, sinalou que se “debe “deixar de competir”, porque así “o claro gañador” é o aeroporto de Oporto, o Sá Carneiro e o “perdedor é toda Galicia”.

Para Cela, “só hai un futuro”, que pasa por “máis rutas e máis frecuencias e mellores prezos”, así como establecer unha base loxística dunha liña de baixo custo. Ademais, é preciso mellorar as conexións.

Do “fracaso” actual na “coordinación” e “especialización” que reclama para a xestión aeroportuaria galega culpou á Xunta. Ademais, esixe unha estación intermodal para Santiago, unha vella reclamación que por agora está paralizada.

MODELO DE CIDADE

Por outro lado, defendeu que o BNG-Asembleas Abertas ten “un modelo de cidade”, que toma tamén como modelo nalgúns aspectos a Pontevedra, sen que iso signifique “peatonalizar” toda a cidade sen antes buscar alternativas de aparcamento, ao respecto do que comprometeu novos parkings públicos a prezos “alcanzables”.

Promete unha “reindustrialización” da cidade, dispoñendo de chan industrial para tal efecto, e impulsar o “potencial” agrario que ten o concello, con 223 quilómetros cadrados.

Así mesmo, avoga por aproveitar o “plus” que ten a capital ao ser sede da Universidade de Santiago de Compostela (USC), e se comprometeu a defender, dende o Concello, un financiamento axeitado para a institución académica, así como a potenciar o seu carácter innovador.

Tamén apostou por converter o casco histórico nun lugar de residencia e sumouse á proposta de revisar a “sobresaturación” de tendas de recordos e o exceso de prazas hoteleiras; e prometeu reforzar o papel cultural da capital.

“Temos un proxecto de cidade e o aval destes anos. A cidadanía xa coñece ao BNG e sabe o que pode esperar de nós”, proclamou Cela, quen subliñou que os nacionalistas “non só queren cambiar de páxina, senón cambiar de libro”.