O campus ‘7H baixo paus’ finaliza con éxito na xornada de porteiros de fútbol sala

O campus de porteiros ‘7H baixo paus’ xa é todo un referente no traballo específico de porteiros en Santiago de Compostela. O gran éxito da terceira edición do coñecido campus, organizado conxuntamente polo Santiago Futsal e a escola de porteiros MFS, fai presaxiar xa unha cuarta edición.

O campus, celebrado o pasado venres, contou coa asistencia de 21 participantes, algúns deles chegados desde Ourense, Vigo e mesmo Madrid. Todos eles gozaron das diferentes sesións que os monitores desenvolveron ao longo do día, tanto de traballo específico como sesións audiovisuais, así como contar coa visita do corpo técnico do Santiago Futsal Santi Valladares e Marcos Mecías, e dos xogadores Diego Quintela, Lucas Bolo e Juan ‘Gallego’.

Coa entrega dos certificados de asistencia deuse por finalizada esta terceira edición do campus de porteiros, que xa se consolida como un dos mellores campus de porteiros de base do fútbol sala galego.

O persoal do Santiago Futsal visitará mañá Padel Compostela e El Correo Gallego

O primeiro equipo do Santiago Futsal ten por diante unha semana de maior carga lúdica que de traballo. Tras finalizar a liga regular esta tempada, o persoal dedicará este mes de Maio a realizar diversas actividades con patrocinadores e colaboradores do club como mostra de agradecemento ao apoio recibido esta tempada. Así, os primeiros actos do Santiago Futsal comezarán mañá pola mañá ás 10h, coa visita ás instalacións de Padel Compostela, onde demostrarán a súa pericia coa raqueta. Pola tarde, persoal e corpo técnico visitarán as instalacións de El Correo Gallego ás 19h, onde os recibirá o director Don. Jose Manuel Rei Nóvoa.

A mañá do mércores, todo o persoal do Santiago Futsal asistirá á clase de Body Combat que se imparte no ximnasio do Multiusos Fontes do Sar. Como xa ocorreu fai un par de meses, cando asistiron a clase de Bailoterapia, os xogadores asistirán a unha das clases dirixidas que imparten os monitores do ximnasio.

A última actividade da semana terá lugar a tarde do xoves cando visiten as instalacións da empresa Arines SL, un dos principais patrocinadores do club esta tempada e cuxo logo luciu no equipamento branco.

Desta maneira, o Santiago Futsal comeza a primeira semana dun mes no que aínda quedan moitas sorpresas por descubrir.