Mantense a pena de dous anos e medio de prisión para unha acusada por tráfico de drogas

A Fiscalía mantén a petición de pena de dous anos e medio de prisión para unha muller acusada de tráfico de drogas por pasarlle a un amigo unha pequena cantidade de cocaína envolvida nun papel de aluminio simulando darlle un bico cando o home estaba detido por un suposto delito de violencia de xénero.

Na última sesión do xuízo, as partes elevaron as súas conclusións e deron lectura aos seus informes. Deste modo o xuízo quedou visto para sentenza na Sección Segunda da Audiencia Provincial da Coruña.

Para a Fiscalía, os feitos son “claros” e “contundentes”, posto que a muller actuou “libremente”. “Faino pola súa propia decisión”, engade o fiscal, mentres que a defensa insiste en xustificar a actuación na “amizade” que ten a procesada con este home.

Precisamente, antes da lectura dos informes, declarou o varón a quen a acusada lle entregaría a droga. Este home sinalou que a muller acudiu ao cuartel onde estaba detido porque el llo pediu.

ACUDIU “POR COMPROMISO”

“Estaba coa síndrome de abstinencia e chameina para que me trouxese un envoltorio que tiña na casa, que contiña metadona e cocaína”, asegurou este home, que apuntou que a procesada acudiu “por compromiso”. “Ela non quería ir”, engade.

“Ela só me trouxo o envoltorio que lle pedín”, afirmou esta testemuña ante o tribunal que xulga a muller para a que piden dous anos e medio de prisión por un delito de tráfico de drogas.