José Roselló presenta no Museo de Pontevedra o libro “El lenguaje de la imagen gráfica”

Editado polo Servizo de Publicacións da Deputación de Pontevedra, “El lenguaje de la imagen gráfica” divídese en dúas partes que tentan achegarnos ós conceptos de debuxo e deseño, así como resaltar a importancia da comunicación visual. Desde a premisa de que a facultade de debuxar e a linguaxe da imaxe son inherentes á condición humana, José Roselló desenvolve a súa teoría sobre a autoexpresión gráfica como medio de comunicación e destaca a importancia do respecto e o estímulo da creatividade persoal. Unha teoría da que proporcionará máis detalles o mércores, na presentación do libro que terá lugar no Sexto Edificio do Museo de Pontevedra.

O Debuxo no ensino

O libro avalía a situación actual do Debuxo no ensino; defínense e analízanse, desde un punto de vista histórico, diversos conceptos (linguaxe gráfico-plástica, deseño, arte ou mensaxe) e define o concepto de debuxo.

Na obra tamén se describen todos os elementos que interveñen na imaxe gráfica; todo isto acompañado de numerosas imaxes de diferentes obras de arte que exemplifican a teoría exposta.

José Roselló Valle

Doutor en Belas Artes pola Universidade Complutense de Madrid e catedrático de Debuxo da Universidade de Vigo, José Roselló Valle dedicou a súa vida ó ensino. Durante cincuenta anos exerceu como profesor en numerosos centros educativos de toda España: a Escola Superior de Belas Artes de Valencia, o Colexio Inmaculada e os Institutos Técnico e Nacional de Bacharelato de Marín, o Instituto Nacional de Bacharelato Sánchez Cantón ou a propia Facultade de Belas Artes de Pontevedra, na que desempeñou ademais diversos cargos no Decanato.