CUT e CIG denuncian á dirección de PSA Vigo por coaccións e ameazas a empregados

Anuncio da denuncia

Os sindicatos CIG e CUT presentarán nos xulgados unha denuncia contra a dirección da fábrica en Vigo de PSA Peugeot Citroën por supostas coaccións e ameazas aos traballadores para que “non vaian á folga” por horas que convocaron para este martes, día 5, en protesta contra o ‘Plan de Presentismo, as “altas cargas de traballo” e os “altos ritmos de produtividade”.

Así anunciárono este luns o secretario xeral da CUT, Manuel Camaño, o secretario da federación de industria da CIG, Xosé Bouzas, e os delegados de ambos os dous sindicatos na empresa, Vítor Mariño e Manuel Domínguez, respectivamente, que comunicaron que xa denunciaron estes feitos ante a Inspección de Traballo.

En concreto, os sindicalistas indicaron que a empresa repartiu unha nota na que expresa que a folga foi convocada por “unha minoría” e ten “carácter abusivo ao estenderse dúas horas en cada quenda”, e na que informa de que “aquelas persoas que participen de forma activa nesta convocatoria poderían verse afectadas polas consecuencias dunha posible declaración de ilegalidade desta”.

Non obstante, os voceiros defenderon que a convocatoria ten “toda lexitimidade”, pois “no dereito laboral español calquera sindicato está lexitimado, con presenza ou non nun centro de traballo, a convocar as folgas que queira”. É por iso que criticaron que con esta misiva se pretende “coartar o dereito dos traballadores a exercer a folga” e “ameazar” con “tomar represalias”, como “medidas disciplinarias de emprego e soldo”.

De feito, trasladaron que os encargados dos distintos departamentos están a realizar “enquisas” aos traballadores para “ter un listado” daqueles que van secundar a folga e así “tomar represalias” contra eles. “É unha ameaza clara para meter medo, amedrentar os traballadores para que non vaian á folga”, aseveran.

Respecto a esta cuestión, fontes da empresa, que descartaron entrar a valorar a decisión dos sindicatos, si aclararon en declaracións que os mandos non están a preguntar “quen vai secundar folga”, senón “con quen poden contar para traballar” durante a xornada de paros.

A folga convocada por CIG e CUT ten como fin posicionarse contra as “altas” cargas e ritmos de traballo e facer unha chamada de atención cara ao diálogo cos traballadores. A folga desenvolverase en quenda de mañá entre as 9,00 e as 11,00 horas e en quenda de tarde entre as 17,00 e as 19,00 horas, ambos os dous o día 5, e na quenda de noite entre as 2,00 e as 4,00 horas do día 6.

INSPECCIÓN DE TRABALLO

Os delegados sindicais das dúas centrais sindicais sinalaron que, se ben o pasado 30 de abril presentaron a denuncia ante a Inspección de Traballo por estes feitos, a pesar de que se trata dunha “infracción moi grande” como é “vulnerar o dereito fundamental” da folga “, como é Citroën, miran para outro lado”.

Aínda así, avanzaron que un inspector acudirá este martes á planta viguesa da factoría para “verificar” se a nota informativa da empresa se atopa nos taboleiros e se se cobren os postos de traballo daqueles traballadores que secunden a folga.

Cuestionados polos xornalistas acerca dos servizos mínimos, indicaron que a dirección da empresa non os marcou, e fixeron fincapé en que a única comunicación que tiveron por parte da compañía tras anunciar a convocatoria de folga “foi o comunicado” que fixeron chegar aos empregados.

Esta situación prodúcese despois de que o pasado mes de novembro a CUT presentase outra denuncia contra a dirección da planta viguesa tamén por un suposto intento de “coartar o dereito de folga” co obxectivo de impedir que se levasen a cabo os paros convocados por esta central sindical en protesta polos axustes salariais.

“A NINGUNHA PARTE”

Pola súa parte, o voceiro de CC.OO., Pedro Comesaña, recoñeceu que o seu sindicato coincide en “parte” co problema que denuncian CIG e CUT, se ben non comparte “a acción”, pois se convocou os paros a partir dunha “asemblea con 60-70 traballadores, levando á folga a 6.000”, o que cre que “non vai a ningunha parte”.

“Ten que haber unha posición maioritaria porque unha folga se fai para gañar e dar unha mensaxe á empresa; o que non podemos é facer unha folga con 60-70 traballadores”, mantivo o sindicalista, que avogou porque a dirección e os empregados senten “a falar das problemáticas para dar respostas, solucións”.

VEHÍCULO 12 MILLÓNS

Os voceiros de CIG e CUT destacaron que a mobilización foi convocada para este martes día 5 porque é cando está previsto que saia polas liñas de produción da planta o vehículo 12 millóns, motivo polo que o presidente da empresa, Carlos Tavares, visitará o centro vigués.

Fontes da empresa confirmaron que Tavares visitará a planta e formará parte dunha fotografía conmemorativa polo vehículo 12 millóns. Ademais, indicaron que está previsto que o presidente manteña unha reunión co comité de empresa e que, posteriormente, acuda á sede do Centro Tecnolóxico de Automoción de Galicia, en O Porriño.

Os sindicalistas consideraron a visita de Tavares como unha acción de “mercadotecnia” e ante os medios sinalaron que, aínda que lles avisaron de que o presidente mantería unha reunión co comité de empresa –no que hai dous membros da CIG e outros dous de CUT–, aínda non recibiron a citación oficial.