Comezan as Precatas dos caldos de tipo Barrantes e Autóctono

A comisión organizadora da XLIII Festa do Viño Tinto do Salnés recibiu entre o luns e o martes 55 inscricións das bodegas que se presentan para as catas de tipo Barrantes.  Do tipo Autóctono, que xa se recolleron os días 16 e 17 deste mes, recolléronse nesta ocasión 24 e xa foron enviados e analizados polo centro enolóxico de Leiro.

As primeiras Precatas, que comezaron onte no Centro Social de Barrantes, xa se están a levar a cabo polo comité de catas formado por catadores e viticultores con representación de tódalas parroquias de Ribadumia e continuarán ata o sábado 30 de maio. As primeiras Catas, que comezan a partir das 21:00 horas están abertas ó público en xeral que poderá participar na degustación de xeito gratuíto. 

Finalmente, as precatas finais realizaranse os días 3 e 4 de xuño a partir das 21:00 horas, e en véspera do comezo da Festa do Viño Tinto do Salnés. O caldo gañador será coñecido o sábado 6 de xuño na Carballeira no mesmo acto de nomeamento dos valedores.