A ultramaratonista dominicana Mariluz Viñas enfróntase a #ElRetodelCamino

Presentación de #ElRetodelCamino. Foto: X. Crespo

A ultramaratonista dominicana Mariluz Viñas realizará correndo 15 etapas de 52 quilómetros do Camiño de Santiago, durante outros tantos días, para completar #ElRetoDelCamino, un evento turístico, deportivo e solidario organizado pola axencia Tee Travel. A atleta comezará o seu percorrido o 27 de setembro en St. Jean Pied de Port (Pireneos Atlánticos, Francia), e finalizará o 11 de outubro na Praza do Obradoiro.

O evento foi presentado este martes na Sala Eisenman da Cidade da Cultura, nun acto ao que asistiron a directora de Tee Travel, Mar Rodríguez; a directora de Turismo da Xunta, Nava Castro; o secretario xeral para o Deporte en Galicia, José Ramón Lete; e a propia Mariluz Viñas.

A ultramaratonista elixiu percorrer 52 quilómetros diarios dado que este ano cumpre 52 anos. O obxectivo do reto é o de axudar á Fundación St. Jude, institución dominicana sen ánimo de lucro enfocada a apoiar nenos con cancro. A organización de Tee Travel indicou que a cada quilómetro “realizado con esforzo” pola corredora se lle deu un valor dun euro, e animou a colaborar co proxecto.

Na súa intervención, Viñas subliñou que o evento “é un dos retos máis significativos” da súa vida, e asegurou que sempre quixo facer o camiño de Santiago. “É un reto que me emociona”, aseverou, e agregou que “os nenos da fundación están a enfrontar un reto moito máis difícil”.

RUTA XACOBEA EN AUXE

Pola súa banda, Nava Castro destacou que o Camiño, “principal elemento de captación internacional”, ten cada vez máis adeptos. A responsable de Turismo cre que a ruta xacobea “está en auxe”, e asegurou que a Xunta continuará facendo promoción “de o principal recurso turístico de Galicia a nivel internacional”.

Así mesmo, José Ramón Lete indicou que “co deporte construímos marca”, e congratulouse de que co evento se poida “vincular Camiño, solidariedade e deporte”. O alto cargo autonómico desexou Viñas que senta “a mesma paixón que sentiu o primeiro peregrino no ano 950”.

A directora de Tee Travel sinalou que o evento representa “un reto para a corredora e para a organización” e que a ultramaratonista “necesita apoio”, polo que animou a que, quen estea interesado, se sume a esta iniciativa colaborando ou acompañando a atleta durante o reto.