A Coruña acolle o Programa de Desenvolvemento de Destrezas Persoais e Habilidades Directivas, de 60 horas lectivas

A Asociación de Enxeñeiros Industriais de Galicia e a escola de negocios Afundación organizan o Programa de Desenvolvemento de Destrezas Persoais e Habilidades Directivas, un curso formativo de 60 horas lectivas que terá lugar na Coruña todos os venres e sábados entre o 5 de xuño e o 18 de xullo. Un curso que nace para cubrir unha carencia das titulacións universitarias, especialmente as técnicas, que fan fincapé no desenvolvemento de coñecementos e deixan de lado a área do desenvolvemento de destrezas persoais e habilidades para a dirección.

Pola contra, este curso está dirixido a desenvolver esas destrezas e habilidades necesarias para a dirección de empresas e entidades. Así, o alumnado aprenderá a mellorar as súas destrezas persoais, fomentando a creatividade e a xestión eficaz do tempo. Así mesmo, melloraranse as habilidades de comunicación nas relacións interpersoais do alumno, aprendendo estratexias avanzadas de negociación. Finalmente, o curso fará fincapé na dirección eficaz de persoas, explicando como afrontar os problemas e tomar as decisións adecuadas.

O programa ten unha duración total de 60 horas, subdividido en sete sesións de 8 horas e unha mesa redonda de traballo final de 4 horas. O prezo de inscrición é de 650 euros, aínda que os colexiados ao Colexio de Enxeñeiros Industriais de Galicia terán unha tarifa reducida de 480 euros e aqueles que, a maiores, tamén sexan socios da Asociación de Enxeñeiros Industriais de Galicia, terán un prezo especial de 360 euros.