A Concellería de Saúde de Ourense pon en marcha o programa de prevención de boas prácticas alimentarias

A Concellería de Saúde do Concello de Ourense pon en marcha unha nova edición do programa de promoción de boas prácticas alimentarias e prevención activa da obesidade. O seu obxectivo é fomentar patróns alimentarios equilibrados que garantan unha nutrición máis saudable na poboación e sensibilizar sobre os beneficios dunha dieta equilibrada e o mantemento dun peso axeitado, corrixindo erros na alimentación diaria.

A concelleira de Saúde, Marga Martín, a dietista-nutricionista Marisol López e a coordinadora da Escola Municipal de Saúde, Yolanda Colmenero, presentaron este programa, que inclúe accións dirixidas a comedores colectivos, escolares e poboación en xeral, actuando desde a prevención fronte a obesidade, unha pandemia caracterizada polo exceso do peso corporal, que se está a converter nunha das maiores ameazas para a saúde nos tempos actuais. Galicia ten unha das taxas máis elevadas de España, cun 23% de persoas con obesidade e 42% de sobrepeso, segundo os datos da Enquisa Nacional 2007.

O programa inclúe 4 tipos de accións:

1. Plan de menú para comedores

Un servizo de asesoría alimentaria para comedores colectivos (centros de ensino, escolas infantís, residencias, centros sociais…), que ofrece formación, recursos e colaboración. Proporcionará plans de menús cíclicos aos comedores para cada tempada do ano, equilibrados e adaptados aos/ás comensais.

2. Aula alimentaria nos comedores

Dirixida a escolares de 4º de Primaria (9-10 anos), idade na que comezan a adquirir os hábitos e estilos de vida, polo que resultan máis eficaces as intervencións en promoción e prevención da saúde, con tres tipos de obradoiros:

– Aprendendo a ler o etiquetado dos alimentos,

– Descubre, coñece e experimenta cos aditivos alimentarios

– Claves da alimentación saudable. Aprendamos cociñando

3. Aula alimentaria para poboación en xeral.

Ofertará dous cursos, especialmente dirixidos a persoas que atenden comedores colectivos:

– Hixiene e manipulación de alimentos: días 16 de outubro e 21 de abril, con dúas quendas, mañá e tarde

– Actualización normativa de alérxenos alimentarios nos comedores: 9 de xullo e 21 de xaneiro, pola mañá.

4. Promoción do exercicio físico

Coa actividade “Paseos para todos/as” que se desenvolverá os 4 sábados do mes de xuño pola mañá. Son 4 rutas deportivo-culturais, pensadas para persoas de tódalas idades, que discurrirán por zonas de especial interese e actractivo. Non requiren inscrición previa, terán como punto de saída e chegada (ás 10 e 13h) o Pavillón Municipal dos Remedios:

– Sábado 6 de xuño: Ruta do Miño

– Sábado, 13 de xuño: Ruta do Barbaña

– Sábado, 20 de xuño: Ruta do Castro Santomé

– Sábado, 27 de xuño: Ruta Botánico de Montelagre

Información e inscricións

As persoas interesadas en participar nas actividades propostas neste programa poden solicitar máis información ou inscribirse na Concellería de Saúde do Concello de Ourense, na rúa Concordia, 20, entrechán, teléfono 988 510622, correo electrónico alimentacion@ourense.es