Xunta e deporte galego renderán homenaxe a David Cal

A Xunta de Galicia renderá homenaxe ao mellor deportista olímpico español da historia, David Cal, o próximo xoves día 9 en Vilagarcía de Arousa. A homenaxe, que estará presidida polo titular da Xunta de Galicia, Alberto Núñez Feijóo, celebrarase durante o acto de entrega dos recentemente fallados Premios do Deporte Galego 2014, e contará coa presenza do propio deportista logo de ter anunciado a súa retirada da alta competición.

David Cal é o deportista olímpico español mais laureado de tódolos tempos, con cinco medallas nuns Xogos Olímpicos (un ouro e catro pratas) ademais de, entre outros méritos, conseguir 5 medallas en Campionatos do Mundo e 6 en Campionatos de Europa. Asemade, e xunto a outras condecoracións deportivas, obtivo o Premio Nacional do Deporte Don Felipe de Borbón 2004 e a Medalla de Ouro da Real Orde do Mérito Deportivo 2003.

O deportista naceu en 1982 no concello de Cangas de Morrazo, iniciándose no mundo do piragüismo aos 8 anos, e xirando a súa vida deportiva en torno ao Club de Mar Ría de Aldán e ao Centro Galego de Tecnificación Deportiva, onde comezou a adestrar con 14 anos.