Vigo acollerá o II Memorial Henrique Otero Covelo

Mañá martes 14 de Abril, e o vindeiro venres día 17 a cidade de Vigo acollerá os actos do II Memorial na Honra de Henrique Otero Covelo. Este memorial, que está organizado pola Asociación de Gaiteiros Galegos e o Conservatorio Superior de Música de Vigo, será aberto e de balde para todos os públicos.

Cando se cumpren dous anos do pasamento de D. Henrique Otero, a Asociación de Gaiteiros Galegos e o  Conservatorio Superior de Música de Vigo queren amosar o recoñecemento do valor patrimonial que a vida e a obra do mestre Otero significa para a nosa cultura. Este II memorial segue o camiño que permitirá realzar e descubrir constantemente a obra deste senlleiro personaxe da música galega sen par.

Henrique Otero deixou no seu legado o seu traballo como impulsor do ensino académico da gaita (sendo o primeiro profesor da historia deste instrumento nun conservatorio), foi o primeiro gaiteiro que editou un método para o seu aprendizaxe e o primeiro que logrou formar unha banda de gaiteiros na cidade olívica alá polo ano 1981, foi tamén membro do grupo histórico ”OS CRUCEIROS” e deixou non menos de 250 composicións para gaita galega …

Henrique Otero deixou unha herdanza na comarca de Vigo de amor pola gaita galega e polo traballo ben feito, converténdose nunha ponte entre o gaiteiro rural e o gaiteiro urbano, entre o gaiteiro que foi e o músico que formou parte durante 40 anos da hoxe desaparecida banda municipal de Vigo.

O martes 14 de Abril ás 19.00 horas terá lugar o I Simposio sobre a vida e a obra do mestre Henrique Otero na biblioteca do Conservatorio Profesional de Música de Vigo. (R/ Felipe Prósperi).

Posteriormente, o venres 17 de Abril, ás 19.30 horas terá lugar o Concerto Homenaxe, este realizarase no Conservatorio Superior de Música de Vigo sito na rúa Manuel Olivié 23 – O Castro – Vigo.