Un total de 29 empresas e entidades galegas participan na feira de alimentación Seafood de Bruxelas

A Xunta promociona os produtos galegos do mar na European Seafood Exposition 2015, que se celebra en Bruxelas desde hoxe ata o vindeiro xoves. O secretario xeral do Mar, Juan Maneiro, trasladouse ata alí para apoiar coa súa presenza ao sector galego e aos produtos do mar da nosa Comunidade que se poñen en valor neste certame, fundamentalmente pertencentes ás áreas da pesca, conxelado, ultraconxelado, transformación, acuicultura, comercialización e conserva.

Esta feira está considerada coma o maior evento sectorial do mundo no eido do comercio dos produtos marítimo-pesqueiros. Das arredor de 40 empresas galegas presentes neste certame, 29 están albergadas no posto de 447 metros cadrados que ten a Consellería do Medio Rural e do Mar nesta feira.

Datos da Seafood

A European Seafood Exposition é unha feira anual que se celebra no palacio de exposicións da capital comunitaria. Na pasada edición participaron 1.635 empresas expositoras de 76 países e tivo máis de 25.000 visitantes

Ademais dos produtos do mar, na feira tamén se promoven sectores como o dos equipamentos e maquinaria para o procesamento industrial, embalaxes e contedores, servizos relacionados co transporte e o control da calidade e outros produtos complementarios.