Puy espera que o Parlamento non perda moito coa marcha de Caamaño

O voceiro parlamentario do PPdeG, Pedro Puy, lamentou a perda que supón, ao seu xuízo, a marcha do deputado socialista Francisco Caamaño para a Cámara galega, e asegurou que “gaña a universidade”, a onde se vai o exministro para retomar a súa actividade docente.

“Gaña a universidade e esperemos que non perda moito esta Cámara”, sinalou Puy Fraga preguntado polo anuncio do aínda parlamentario socialista. O parlamentario popular manifestou que “a política perde unha persoa” con experiencia”, pero, ao tempo, recoñeceu, “a universidade gaña un activo”.

“É unha desas persoas que, con independencia de que poidamos discrepar cos seus posicionamentos, contribúe a mellorar ou apreciar o que é a vida pública”, remarcou Puy, que foi compañeiro universitario de Caamaño, de quen dixo ter un “excelente concepto”.