O Servizo Municipal de Emprego de Oleiros xestionou 374 ofertas

O CMF Isaac Díaz Pardo tramitou 374 ofertas de emprego en 2014. En total tramitáronse 83 ofertas máis que no período anterior. Esta cifra supón un incremento do 28,52% respecto ao pasado exercicio.

O 62,30% destas ofertas xestionadas a través do CMF Isaac Díaz Pardo foron realizadas por ofertantes ou empresas de Oleiros. Destaca o feito de que a orixe da maioría dos ofertantes sitúase no contorno comarcal, o noso municipio (233), A Coruña (71), Sada (29), Cambre (12) ou Culleredo (8) fundamentalmente. Pero tamén houbo postos de traballo doutras zonas do país como Vigo (5), Compostela (2) ou Fene, Pontevedra, Foz e Lugo cunha oferta cada unha.

A través das ofertas que se xestionaron no Servizo de Emprego de Oleiros durante o 2014 puxéronse en xogo un total de 453 procesos selectivos finais. Estes procesos supuxeron 128 novos postos de traballo cubertos polo Servizo Municipal de Emprego. Para xestionar estas ofertas os técnicos puxéronse en contacto cun total de 2.899 persoas solicitantes de emprego. Destas deron o seu consentimento para enviar o currículo un total de 1.792 persoas.