O pleno da Coruña aproba o regulamento de honras e distincións da Policía Local

Pleno na Coruña

O pleno da Coruña aprobou esta mañá a modificación do persoal municipal para ampliar en seis efectivos as prazas de bombeiros na cidade e o regulamento de honras e distincións da Policía Local que permite recoñecer os méritos contraídos polos axentes do 092 no exercicio das súas funcións. Ao comezo desta sesión plenaria, o alcalde, Carlos Negreira, leu un comunicado no que quixo sumarse, en nome de toda a Corporación, á dor polas persoas falecidas no tráxico accidente aéreo ocorrido nos Alpes, así como as condolencias aos seus familiares, un “abrazo simbólico” no que aproveitou para lembrar, de maneira especial, a Josep Sabaté.

PERSOAL

A Corporación municipal aprobou de maneira inicial, coa única abstención de EU-Os Verdes, a modificación do persoal municipal para incrementar en seis o número de prazas para o Servizo de Extinción de Incendios e Salvamento (SEIS). Unha vez obtido o visto e prace do pleno, abrirase un período de exposición pública previo á súa aprobación definitiva.

A proposta consiste no aumento de 6 prazas de bombeiros -inicialmente estaban contempladas 4 prazas de novo ingreso para este ano- para así poder completar ata 10 e dar cumprimento á oferta de emprego aprobada por unanimidade na Mesa de Negociación celebrada o 13 de febreiro.

As prazas que se crean no persoal contan cos correspondentes postos dentro da Relación de Postos de Traballo (RPT) do Concello, polo que se cumpren as disposicións legais, xa que primeiro deben constar os postos de traballo na RPT, que será o instrumento indicativo para crear as prazas necesarias no persoal.

Esta modificación no persoal municipal proponse como consecuencia da aprobación da oferta de emprego público para este ano, a petición de todos os sindicatos e consensuada na correspondente mesa de negociación. De feito, na Xunta de Goberno do pasado 23 de marzo aprobouse non só esta modificación, senón tamén a oferta de emprego público, a maior dos últimos anos e que inclúe diferentes convocatorias para a promoción interna de 21 postos. En concreto, son 9 bombeiros (1 oficial, 3 suboficiais, 1 sarxento e 4 cabos), 3 policías locais (2 oficiais e 1 inspector, que se suman á oferta de 2014, que se convoca agora, de 1 inspector principal, 2 inspectores e 8 oficiais), 4 auxiliares administrativos e 5 administrativos. A maiores, súmase a convocatoria de 16 prazas de acceso libre: 10 bombeiros (que se suma aos 3 que entraron en 2014), 4 policías (2 por mobilidade e 2 por novo ingreso; e que se suman aos 5 que se convocan da oferta de 2014), e 2 técnicos medios de xestión.

REGULAMENTO DE HONRAS E DISTINCIÓNS

O pleno tamén deu o visto e prace inicial -coa única abstención do BNG- ao regulamento de honras e distincións da Policía Local, que nace coa finalidade de premiar e distinguir publicamente aos integrantes da Policía Local da Coruña por feitos excepcionais, por feitos de particular relevancia relacionados co servizo policial, por permanencia e por traxectoria profesional exemplar, así como a aquelas persoas ou entidades públicas e privadas que destaquen pola súa conduta a favor do 092. En concreto, establécense cinco modalidades de distincións:

– Placa colectiva ao mérito da Policía Local.

– Medalla ao mérito da Policía Local.

– Medalla á traxectoria profesional, que se entregará anualmente aos axentes do 092 que sobresaian con notoriedade e perseveranza no cumprimento dos deberes do seu cargo ou que realicen estudos profesionais ou científicos relevantes que prestigien as competencias e funcións dos policías locais. Será requisito indispensable ter un mínimo de 15 anos de servizo na Policía Local da Coruña e que non consten antecedentes desfavorables no seu expediente persoal ou pendentes de cancelar.

– Medalla á permanencia no servizo, que tamén se entregará todos os anos e para a que existirán catro distintivos: branco (aos 20 anos), verde (cumpridos os 30 anos), azul (aos 35) e granate (cando se alcancen os 40 anos). Felicitacións públicas.

Para o estudo e valoración das propostas de concesión de medallas e felicitacións, nomearase unha comisión de distincións que actuará como trámite previo á proposta definitiva e que funcionará como órgano colexiado. Esta comisión estará composta por membros da Policía Local e polas organizacións sindicais con representación no Concello.

MEDIO AMBIENTE

Na sesión plenaria celebrada esta mañá no Palacio Municipal de María Pita, o grupo de goberno tamén aprobou inicialmente a modificación da ordenanza de verteduras pola que os usuarios que non conten actualmente cunha rede municipal de saneamento separativa situada diante da fachada do establecemento e na vía pública terán que presentar unha memoria valorada, a modo de anteproxecto, de adecuación interna da edificación de forma que se detallen as obras e actuais que son precisas realizar para contar cunha rede separativa interior de augas pluviais e fecais. Así, unha vez que exista unha rede separativa na vía pública e diante da fachada do edificio, o usuario terá tres meses para realizar as obras precisas no seu local.

O concelleiro de Medio Ambiente, Enrique Salvador explicou que a ordenanza municipal de verteduras é unha iniciativa máis dentro do traballo realizado polo seu departamento. “Executamos a primeira fase do Plan de Saneamento para analizar e diagnosticar o funcionamento hidráulico do sistema, o que nos permitiu detectar xa algunhas actuacións prioritarias a efectuar na rede e lograr paulatinamente unha rede separativa que permita xestionar de maneira correcta as augas pluviais e residuais de forma independente. Instalamos sondas nos principais colectores para detectar a entrada de auga de mar na rede. Seguimos actualizando o inventario dos máis de 534 quilómetros de rede de colectores que asucan o subsolo da nosa cidade, e dos preto de 21.000 pozos de rexistro de pluviais e fecais. Temos telexestionados os bombeos máis importantes da cidade. Pero tamén investimos en obras de mantemento e reparacións, cumprindo o así contido no Plan de Saneamento da ría do Burgo redactado pola Xunta, destinando máis de 4 millóns de euros no período 2012-2015”, concluíu o concelleiro de Medio Ambiente.

OUTROS ASUNTOS

A área de Facenda e Administración Pública levou ao pleno, para a súa toma de coñecemento, as liquidacións do orzamento do Concello e do Instituto Municipal Coruña Espectáculos (IMCE) correspondentes ao ano 2014. O Goberno local logrou bater a marca histórica da cidade en canto á execución do orzamento, tanto a nivel global, alcanzando o 84,79%, como no capítulo de investimentos, cun 65,5%.

Na sesión plenaria desta mañá tamén se aprobaron dúas mocións. A primeira, aprobada polo grupo de goberno, en apoio da modernización e gratuidade dos servizos do Rexistro Civil. En concreto, na moción ínstase o Goberno do Estado a garantir o mantemento dos postos de traballo e persoal interino actuais, apoiando a posibilidade de que sexan funcionarios públicos da administración de xustiza os encargados do mantemento do servizo; o aproveitamento das vantaxes das novas tecnoloxías para desenvolver unha plataforma electrónica que favoreza a tramitación das xestións; o carácter público e de servizo público do Rexistro Civil, manténdose a confidencialidade e a seguridade dos datos; e que as prestacións e trámites que realizan os cidadáns sigan tendo carácter gratuíto.

A segunda moción aprobada no pleno por unanimidade foi relativa ao apoio da Corporación municipal ao sector da dobraxe en Galicia. No texto, presentado polo grupo municipal socialista, solicítase á Xunta que medie ante a CRTVG co fin de manter a execución anual do importe inicial do concurso público coas empresas de dobraxe en lingua galega e os compromisos planificados nas contas de 2014 onde se avanzan os orzamentos de 2015-2017. Ademais, pedirase ao Goberno galego que se garanta o novo contrato marco, dentro do sector de dobraxe en galego, entre a Xunta e a TVG, no que se incluía unha porcentaxe de gasto anual para a dobraxe en galego do 3,5%.