O Jofre acollerá o vindeiro 17 de abril o único recital en España do barítono Leo Nucci

Leo Nucci ofrecerá o vindeiro venres, día 17 de abril, o seu único concerto en España dentro do ciclo “Ferrol en clave lírica”, programado pola Concellería de Cultura do Concello de Ferrol que dirixe Manuel-Reyes García Hurtado. O espectáculo lírico dará comezo ás 20:30 horas no Teatro Jofre e as entradas xa poden adquirirse de maneira anticipada no propio despacho do teatro municipal ou a través da páxina web: www.ferrol.es (apartado Axenda Cultural).

Leo Nucci chega por primeira vez a Ferrol para ofrecer o seu único recital en España durante este ano, no que acompañado do pianista Ramón Tébar, interpretará algunas das máis coñecidas arias de óperas de grandes como Rossini, Bellini e Verdi. Actualmente, o barítono italiano é un dos máis grandes intérpretes verdianos e conta co Premio Ópera Actual 2013 pola súa traxectoria. Probablemente, é o único barítono na historia que interpretou Rigoletto nos teatros máis importantes de todo o mundo, sumando máis de 450 recitais oficiais. Tralo concerto na cidade naval, Nucci incorporaráse aos ensaios de La Traviata para no mes de maio subirse ao escenario do Teatro Real de Madrid.