O goberno de Caballero pedirá declarar Áreas de Rehabilitación Integral en Coia e Cabral

A Xerencia de Urbanismo do Concello de Vigo acordou solicitar a declaración de dúas Áreas de Rehabilitación Integral (ARI) nos barrios de Coia e Cabral, o que afectará a un total de 456 vivendas, ás que se sumarán outras 80 rehabilitacións no Casco Lanuxe e no Barrio Histórico de Bouzas.

Así o comunicou en rolda de prensa o alcalde, Abel Caballero, que indicou que o custo destas remodelacións será, en conxunto, duns 21 millóns de euros, dos que o Ministerio de Fomento afrontará un 35 por cento e os particulares o 65 por cento restante, mentres que o Concello se encargará de afrontar o total da inversión por rehabilitar a parte exterior.

En concreto, coa solicitude das áreas ARI, teñen previsto rehabilitar en Coia 360 vivendas das rúas Bueu, Moaña, Vilagarcía de Arousa e Camiño da Raposa, por un total de máis de 12 millóns de euros. En Cabral, serán 96 vivendas de Casas de Santa Clara, ás que destinarán máis de cinco millóns.

Así mesmo, o Goberno municipal acordou entrar no plan 2013-2016 das Áreas de Rehabilitación do Casco Vello e o Barrio Histórico de Bouzas, onde se farán 60 actuacións por dous millóns de euros e 20 actuacións por máis de millón de euros, respectivamente.

O rexedor destacou que con este proxecto “de enorme ambición” se dará solución a vivendas que presentan “serias deficiencias” e se recuperarán “zonas importantísimas da cidade”. Ademais, manifestou que, tendo en conta que as zonas “reúnen todos os requisitos” para ser ARI, pretenden empezar “de forma inmediata”, “tan pronto como a declaración salga adiante”.

Cuestionado sobre se hai implicación do Consorcio, Caballero aclarou que se trata dunha actuación separada e este organismo ten “a súa propia norma de actuación”. A este respecto, recalcou que aínda que a Xunta di “que inverte non se cantos millóns” nestas actuacións, “é mentira” pois “quen puxo millóns por primeira vez foi o Goberno de Emilio Pérez Touriño, e agora con eses millóns se rehabilita, se vende, e cos ingresos se volve rehabilitar e se volve vender”.

SECTOR PESQUEIRO

Noutra orde de asuntos, o mandatario vigués reuniuse este venres con directivos da Cooperativa de Armadores de Vigo, Arvi, nun encontro no que selaron a súa intención de seguir xuntos nos próximos anos para fomentar a actividade pesqueira e o seu coñecemento por parte da cidade.

Segundo comentou, Vigo ten que ser capaz de conseguir “a consolidación definitiva de todo o núcleo de capital de pesca na cidade”, facendo fronte a situacións como a acontecida con Conxemar, “que tivo un fortísimo ataque dende Barcelona”. Para iso, sinalou que o Concello trasladou toda a súa colaboración ao sector, o que “se”irá plasmando en accións a partir do mes de xuño”.

Finalmente, Caballero tamén destacou que a empresa Frigalsa planea ampliar a súa actividade na cidade de Vigo mediante a ocupación e uso da antiga nave de Freiremar.

Así, comentou que ve “con preocupación ese espazo, que foi abandonado e estase a deteriorar”, e puxo en valor que sexa recuperado, pois “haberá conservación e mantemento e unha nova actividade con xeración importante de emprego”.