O detido por violencia de xénero no Carballiño queda en liberdade

O home detido o xoves no Carballiño (Ourense) por un suposto delito de violencia de xénero despois de ser achada ferida con lesións de arma branca unha muller quedou este venres en liberdade tras declarar tanto el como a vítima que non eran nin foran parella.

Así o informaron fontes xudiciais, que apuntaron a existencia de “contradicións” e que non está claro se se trata dun caso de violencia de xénero, despois de que este venres o individuo pasase a disposición do Xulgado de Instrución 2 do Carballiño tras a súa detención o xoves.

O varón, duns 37 anos, quedou en liberdade sen medidas, de acordo co criterio da Fiscalía, segundo sinalaron as mesmas fontes xudiciais.

Sobre as 23,00 horas do pasado mércores día 15 de abril foi localizada unha muller na vía pública no Carballiño con feridas no abdome causadas supostamente por arma branca. A ferida, duns 45 anos de idade, foi levada en ambulancia a un centro sanitario ourensano.

Ao día seguinte, sobre as 11,30 horas deste xoves, nunha rúa detrás do Concello so Carballiño, axentes da Policía Local detiveron un varón, C.B., duns 37 anos, acusado dun delito de violencia de xénero en relación con estes feitos.