O Concello da Coruña conmemora o Día Internacional contra a homofobia e a transfobia

O concelleiro de Servizos Sociais, Miguel Lorenzo, presentou esta mañá a programación de actividades que o Concello deseñou con motivo do Día Internacional contra a homofobia e a transfobia que se conmemora cada 17 de maio e que na Coruña se celebrará coa organización dunha serie de iniciativas de carácter lúdico que levarán a cabo no mes de maio.

As actividades enmárcanse no conxunto de accións do Programa LGTBI, 2015 que a Concellaría de Servizos Sociais desenvolve e que se centran, fundamentalmente, no ámbito da prevención de actitudes discriminatorias e a garantía dos dereitos das persoas, con independencia da súa orientación afectiva e sexual.

“Como sempre, o principal obxectivo é o de contribuír á prevención e erradicación de actitudes homófobas e discriminatorias cara ás persoas LGTBI, á vez que se sensibiliza á poboación, sobre todo aos máis novos, a favor da diversidade, a igualdade e a convivencia de todas as persoas con independencia da súa orientación sexual”, destacou Miguel Lorenzo.

Neste sentido, o concelleiro de Servizos Sociais subliñou a importancia da implicación das administracións públicas para erradicar este tipo de condutas discriminatorias e explicou o programa de actividades, todas gratuítas, que inclúe actividades en familia, proxección de películas ou charlas en centros educativos.

Actividades en familia

– Contacontos O papaventos vermello, interpretado por Ramiro Neira da compañía Artestudio. Actividade dirixida a nenas e nenos de entre 4 e 10 anos acompañados dun adulto. Os interesados poden solicitar as invitacións nos centros cívicos nos que se realiza.

Cine en Labañou

No centro cívico municipal de Labañou proxectaranse tres películas que foron premiadas en distintos festivais. A entrada será libre e gratuíta ata completar aforamento:

– Venres, 15 de maio, ás 20.30 horas. Hojee u quero voltar sozinho, de Daniel Ribeiro. Premio á Mellor Película outorgado pola Federación Internacional da Prensa Cinematográfica no Festival de Cine de Berlín (Berlinale) en 2014.

– Sábado, 16 de maio, ás 20.30 horas. Flores raras, de Bruno Bareto. Premio do Público no Festival LESGAICINEMAD (Festival de cine lésbico, gai e transexual de Madrid).

– Domingo, 17 de maio, ás 20.30 horas. Une nouvelle amie, de François Ozon. Premio Sebastiane, outorgado pola Asociación de gais, lesbianas, transexuais e bisexuais do País Vasco.

Talleres sobre diversidade afectiva e sexual

Ademais destas actividades do mes de maio, a Concellaría desenvolve un taller sobre diversidade afectiva e sexual nos institutos e colexios da cidade que así o solicitaron. “O obxectivo é o de previr condutas discriminatorias, ensinar a recoñecer estereotipos relacionados co xénero e a homosexualidade e proporcionar ao alumnado información sobre a diversidade afectivo – sexual”, destacou o concelleiro, quen lembrou que o taller está dirixido ao alumnado de 3º e 4º de ESO: “Durante este curso están a impartirse 56 talleres en 15 centros educativos da cidade; un incremento importante respecto dos 36 talleres en 12 centros de 2013/14”.

O programa municipal LGTBI para o ano 2015 complétase cos actos que levarán a cabo durante o mes de novembro e co funcionamento do Servizo Municipal de Información e Mediación LGTBI no centro cívico municipal de Monte Alto (informacionymediacionlgtb@coruna.es). “Non se trata de accións puntuais senón de involucrar a toda a sociedade a través dun traballo durante todo o ano para informar, visibilizar e normalizar ao colectivo”, concluíu Miguel Lorenzo.