O choque frontal dun camión e un turismo na Coruña sáldase sen feridos

A colisión frontal dun camión, que transportaba uns 25.000 quilos de betún, e un turismo rexistrada na mañá deste xoves na Coruña saldouse sen persoas feridas. Así o informou o 112, que indicou que o sinistro tivo lugar sobre as 7,45 horas na saída do polígono da Grela cara á cidade herculina.

As mesmas fontes puntualizaron que ningún dos ocupantes resultou ferido e tampouco a carga do camión se viu afectada. Foi o propio condutor do trailer quen alertou ao CAE 112 Galicia do accidente e indicou que ambos os vehículos, tras a colisión, entorpecían a circulación da vía.

O persoal do 112 Galicia solicitou a intervención dos axentes da Policía Local e dos efectivos de Protección Civil da Coruña.