O Baloncesto Sevilla frea ao Rio Natura Monbus Obradoiro

O Rio Natura Monbus Obradoiro caeu en San Pablo e viu cortada a súa serie triunfal de tres vitorias consecutivas. Os andaluces foron mellores desde o inicio, cun parcial de 11-0 de saída que non puido levantar o combinado galego.

O neozelandés Kirk Penney castigou durante toda a tarde ao Rio Natura Monbus, desde o arco de tres puntos, con catro acertos, e tamén cargando o rebote. O escolta converteuse nunha peza fundamental para Luís Casimiro. Ademais, Willy Hernangómez recuperou a súa mellor versión, con 15 puntos, 11 rebotes e 22 de valoración.

Nos minutos previos a que dese comezo o encontro, gardouse un respectuoso minuto de silencio en memoria de Lalo García, histórico ex xogador do Club Baloncesto Valladolid. O pavillón presentou unha gran entrada, cun ambiente festivo e enfervorizado, coa afección consciente de que cada partido disputado en San Pablo é transcendental no fragor da intensa batalla por evitar perder a categoría na que se atopa inmerso o club andaluz.

Tampouco estiveron sós os obradoiristas, animados por unha gran delegación de afeccionados desprazados desde La Palma del Condado, pobo natal de Fran Cárdenas. Ademais do base, Juanjo Triguero tamén recibiu unha gran ovación no retorno á que foi a súa casa durante cinco anos.

O explosivo arranque do Sevilla, con Penney e Porzingis repartíndose os puntos, decantou a balanza do encontro. Un soberbio inicio sustentado nunha gran defensa, que noqueou ao Rio Natura Monbus durante os primeiros compases. Antes de que Corbacho inaugurase o marcador, os andaluces enlazaran un doloroso parcial de 11-0. O aro, pechado para os galegos, cuspiu os intentos afastados de Alberto, de Rafa Luz e de Kleber. A falta de acerto en tiros de tres, minou gran parte das opcións de triunfo dos santiagueses.

Aos poucos foise desperezando o Rio Natura Monbus, coa melloría de Maxi Kleber e a dirección de Pepe Pozas. Os de Moncho Fernández puxéronse a rebufo do Sevilla, pero o medo e as dúbidas apoderáronse dos dous contendentes que intercambiaron pasos en falso (15-12).

O conato de reacción obradoirista quedou cortado pola irrupción de Guillermo Hernangómez e Byars. O beirado de Memphis foise ata os 13 puntos e mostrouse moi seguro nos seus tiros de dous, presentando un expediente inmaculado ao final do choque.

No entanto, negouse a sacar a bandeira de rendición a escuadra compostelá. Co combativo Nankivil en cancha, autor de 10 puntos, o Rio Natura Monbus Obradoiro alcanzou ao Sevilla e puxo o empate no marcador, instantes antes de que Haris Giannopoulos caese cunha escordadura no nocello. Oriola, sobre a bucina, devolveu a tranquilidade a San Pablo no intermedio (38-33).

Os andaluces desatáronse na continuación. A porta atrás que culminou Berni Rodríguez foi o presaxio da segunda metade que o Baloncesto Sevilla ofreceu á súa afección. O Rio Natura Monbus non atopou claridade en ataque, asifixiado polo sufocante traballo defensivo dos homes de Luís Casimiro.

O desgaste psicolóxico ao que os sevillanos someteron aos galegos terminou por dar os seus froitos. A canastra sobre a bucina coa que Woodside arruinou unha gran defensa do Rio Natura Monbus, terminou por desmontar aos visitantes. Hernangómez, colgándose do aro, Byars de lonxe e Radicevic puxeron contra as cordas ao cadro obradoirista (55-45).

O último cuarto foi unha festa en San Pablo. A comuñón entre equipo e público nestes últimos meses de competición fixo subir a temperatura no pavillón sevillano e derretiu as esperanzas dos galegos. Pierre Oriola completou unha gran actuación, con 10 puntos e catro capturas, mentres que Byars e Hernangómez sentenciaron ao Rio Natura Monbus Obradoiro.

Os sevillanos collen aire coa oitava vitoria da tempada, mantendo intactas as súas opcións de lograr a permanencia, mentres que o Rio Natura Monbus Obradoiro fai borrón, pensando no duelo do próximo domingo fronte ao Dominion Bilbao Basket (domingo 12, 18:00 horas), que será o Partido do Federado.