Numerosas actividades no Carballiño para celebrar o Día Internacional do Libro

Co gallo da celebración da festividade do Día Internacional do Libro, 23 de abril, ao longo desa semana do 20 ao 24 de abril, terán lugar na vila de O Carballiño, as seguintes actividades de promoción do libro e de fomento da lectura.

– O día 21 de abril en horario de mañá os nenos do grupo de 2-3 anos da “Galiña Azul” visitarán as instalacións da Sección Infantil da Biblioteca Pública Municipal. A continuación terán unha sesión de contacontos teatralizado.

– O día 22 de abril en horario de mañá os nenos de 2ª de Primaria do Colexio Sagrado Corazón visitarán as instalacións da Biblioteca Pública Municipal, explicaraselles o funcionamento da mesma, ofreceraselles a posibilidade de facerse socios e, finalmente, terán tempo libre para que exploren por si mesmos como é a Biblioteca Infantil.

– Xa pola tarde, a partires das 17.30 horas, de man da compañía Xandobela, terá lugar a actividade “Pan e auga? Sopas!” actividade cofinanciada pola Secretaría Xeral de Cultura da Xunta de Galicia con cargo ó programa “Ler conta moito”.

– O día 23 de abril, a partires das 17.00 horas na Praza Maior, a Biblioteca Pública Municipal en colaboración coas Bibliotecas dos Institutos da vila, farán unha pequena exposición dos seus libros e realizarán diversas actividades de promoción do libro e da lectura (lectura pública de poesía, lectura en distintos idiomas…)

– Por último, o venres 24 de abril, a partires das 17.30 horas, haberá un taller de manualidades na Sección Infantil da Biblioteca Pública Municipal. O taller consistirá na confección dun libro empregando material diverso.