Noriega aspira a converterse na lista máis votada en Santiago

O candidato á Alcaldía de Santiago por Compostela Aberta, Martiño Noriega, salientou este xoves que o seu obxectivo é que a lista que encabeza sexa “a máis votada” na capital galega nas próximas eleccións locais, de modo que poida “liderar o cambio na cidade”. En caso de estar na oposición, será “responsable” no que incumbe á súa permanencia no Pazo de Raxoi, pero matizou que non se poden “facer promesas a longo prazo”.

“Porque se hai un ano me din que hoxe estaría aquí negaría a maior 15 veces, e estou aquí”, xustificou, ao ser preguntado sobre o seu futuro nun almorzo informativo do ‘Fórum Europa. Tribuna Galicia’.

Con todo, descartou a posibilidade de que non vaia a resultar vencedor nos comicios de maio e reafirmouse neste prognóstico á vista das críticas que recibe doutras formacións. “Mostran a súa preocupación por que a xente percibe que esta candidatura cidadá pode ser unha alternativa de goberno”, reflexionou.

Acerca das declaracións do candidato socialista Paco Reyes, referendadas polo exalcalde compostelán José Sánchez Bugallo, sobre que só haberá cambio” en Santiago se este “pivota sobre o PSOE”, resolveu que “non pode dicir outra cousa”. “Outra cousa é que a cidade crea que iso é así”, apostilou, antes de resolver o asunto ao sinalar que os votos dos composteláns porán “a cada un no seu lugar”.

De feito, o tamén alcalde da veciña localidade de Teo augurou “unha polarización” do voto entre o PP e Compostela Aberta, sobre todo, á vista da “equidistancia” que mantén o PSOE entre ambos os modelos de cidade.

PACTOS POSTERIORES

Ao fío diso, pensando na investidura como alcalde, volveu a urxir aos socialistas para que clarifiquen se, “chegado o momento”, permitirán “a apertura dunha nova etapa” ou apostarán por “afianzar a existente”. “Non falamos de pactos co PSOE, de grandes acordos de goberno”, puntualizou.

En canto ao BNG, formación na que militou durante 18 anos ata a escisión de ANova -da que é portavoz actualmente-, opinou que “moitos” están “condenados a camiñar xuntos”. Por tanto, descartou que xurdan “problemas” á hora de alcanzar acordos polo seu abandono da fronte nacionalista, máxime cando Compostela Aberta é “un lugar de encontro que vai máis aló dunha posición partidaria”.

Así, tras chancear con que “nunca” fala “mal” dos seus “ex”, o aspirante ao bastón de mando na capital galega por esta plataforma cidadá deu por feito que “pode existir un posible espazo ao redor dun proxecto de cidade co BNG”.

Iso si, subliñou que as eventuais alianzas decidiranse a través “dun proceso de participación” en Compostela Aberta como o que se seguiu para a elaboración da candidatura. A única máxima xa establecida é que “nin de maneira activa nin de maneira pasiva” facilitará “a reedición do goberno do PP” polos “malos resultados” que, ao seu xuízo, deu á cidade.

“NON SON UN EXTRATERRESTRE”

Preguntado sobre se resta peso cidadán á súa candidatura, tendo en conta da súa vinculación ao aparello político de ANova, Martiño Noriega evidenciou que “o 70 por cento” dos 15 primeiros postos da lista está ocupado por persoas “non organizadas partidariamente”.

Máis aló diso, deixou claro que el “non” é “un extraterrestre”, senón “un cidadán”, e defendeu que “ninguén ten que esconder a súa afiliación política”. A súa elección como cabeza de cartel, explicou, partiu de que o seu perfil é “transversal”, de persoa “de consenso”.

Por último, destacou que percibe “un retorno ilusionante” da cidadanía “nun contexto de esgotamento do réxime do 78” e esgrimiu que, a pesar de ter “menos recursos” e estar “en desigualdade de condicións” con respecto ás forzas maioritarias, o seu grupo ten a forza das “ideas” para facer unha campaña “diferente”.