Máis de 600 alumnos de Educación Secundaria da provincia da Coruña participaron no programa ‘Clases sen fume’

A delegada territorial da Xunta na provincia, Belén do Campo, presidiu esta mañá no instituto de Educación Secundaria (IES) Eusebio da Guarda da Coruña a sesión de clausura do programa educativo para a prevención do tabaquismo “Clases sen fume”, que organiza a Consellería de Sanidade, en colaboración coa Consellería de Cultura, Educación e Ordenación Universitaria. Nesta edición, que acada a número trece, participaron un total de 627 alumnos e alumnas de Secundaria de 13 centros educativos da provincia repartidos nos concellos da Coruña, Arzúa, Carballo, Cerceda, Fisterra, Frades, Laxe, Muros, Pontedeume, Ribeira, Santiago, Touro e Vimianzo.

No encontro cos 100 rapaces e rapazas deste centro coruñés, Do Campo estivo acompañada pola xefa territorial de Sanidade, Cristina Pérez, o xefe territorial de Educación, Indalecio Cabana, e a coordinadora provincial do programa, Berta Gómez, que ofreceu unha conferencia sobre “Publicidade, xoves e tabaco”. Tamén asistiu a directora do IES, Isabel Ruso.

A iniciativa está dirixida a estudantes de 1º e 2º da ESO, é dicir, de entre 12 e 14 anos. Unha vez rematadas as actividades vinculadas ao programa, baseadas no compromiso individual e colectivo de toda a aula (escolares e titor), de non fumar durante, polo menos, seis meses, o departamento autonómico concederá nas vindeiras semanas diversos galardóns para premiar os proxectos do alumnado participante nas categorías de mellor actividade creativa, mellor slogan e “Clases sen fume 2014-2015”.

A través deste proxecto refórzase o carácter voluntario da decisión de non fumar, facilítase a presión de grupo positiva xerada pola complicidade dun grupo de adolescentes e dun adulto, que é o titor ou titora, e, ademais, fortalécese a confianza nun mesmo e nos demais, ao tempo que se utiliza a recompensa/premio como incentivo.

Neste senso, a delegada territorial agradeceu a alta participación e implicación do alumnado e lembrou que “o tabaquismo é un do maiores problemas sanitarios aos que nos enfrontamos, que ten numerosas repercusións na saúde que en moitos casos non se aprecian no curto prazo”. “O coidado da saúde, da propia e da dos demais, é responsabilidade de todos”, engadiu a máxima representante do Goberno galego na provincia, quen apuntou que, “para iso, é preciso estar ben informados e saber utilizar os recursos dispoñibles”.

Para a delegada territorial, “o máis valioso desta experiencia é que todos os participantes tiveron a oportunidade de adquirir durante este curso uns coñecementos que lles reafirmarán na decisión de non fumar ao longo da súa vida, unha das decisións cruciais para asegurar unha boa saúde”.