Gran representación do piragüismo galego na Copa de España de 1.000 metros

A Copa de España de 1.000 metros que se disputará o próximo fin de semana en Trasona (Asturias) volverá ter unha gran representación galega. A segunda cita máis importante da tempada a nivel nacional tamén supón un desafío para o Kaiak Tudense, gañador do Campionato de España de inverno e líder a liga Olímpica de Pista Hernando Calleja. A competición desenvolverase o sábado todo o día e o domingo pola mañá e á mesma asistirán os mellores padexeiros galegos.

A Copa de España está destinada para as modalidades de K-1, K-2, K-4, C-1, C-2 e C-4, tanto na categoría masculina como na feminina. O sábado disputaranse as regatas individuais e de barcos dobres. Para o domingo quedarán os de catro compoñentes.

Para a cita inscribíronse un gran número de padexeiros de equipos galegos. Ton Campos, Diego Romero, Óscar Carreira, André Oliveira, Rubén Millán, Ramón Ferro, Óscar Graña, Rodrigo Germade, Carlos Pérez Rial, Roi Rodríguez, Adrián Sieiro, Sergio Vallejo, Raquel Rodríguez, Jenifer Casal, Carla Pérez, Raquel Dacosta e Camila Aldana Morison, entre outros, estarán presentes en Trasona. Varios deles competirán tanto na modalidade de individual como na de barcos de equipos.

O Kaiak Tudense aspira a gañar a competición por clubs. Lidera a liga de Pista Hernando Calleja e terá no Aranxuez e o Náutico de Sevilla aos seus principais adversarios. As seguintes citas desta liga serán a Copa de España de 500 e 200 metros, e o Campionato de España de verán. Ambas disputaranse en Verducido.

Ademais do club tudense, en Trasona tamén estarán presentes o Breogán do Grove, Boiro Rías Baixas, As Torres Romaría Viquinga, Naval de Pontevedra, Ría de Betanzos, Pontecesures, Cidade de Pontevedra, Pontecesures, Verducido Pontillón, As Pontes, Firrete, Poio Conservas Pescamar, Ribeiras do Tambre, Club Piragüismo Aldán e Fluvial de Lugo.