Beatriz Mato avoga por promover o benestar no lugar do traballo

A conselleira de Traballo e Benestar, Beatriz Mato, destacou hoxe que a redución de accidentes laborais, o aumento da produtividade ou a satisfacción dos traballadores e traballadoras contribúen a mellorar a eficiencia e a rendibilidade das empresas. Por iso, apostou por fomentar o benestar no lugar de traballo e acadar “unha coordinación eficaz” en materia de seguridade e saúde laboral para reducir a sinistralidade.

Así o destacou en Vigo, onde Beatriz Mato participou no Día da Seguridade e Saúde no Traballo da factoría de PSA, unha data que se celebra mañá a nivel mundial baixo o lema ‘Únete á construción dunha cultura da prevención en materia de seguridade e saúde no traballo’ co obxectivo de dar visibilidade á prevención de riscos e concienciar ao conxunto da sociedade da súa importancia. “Apostar pola saúde no traballo ofrece beneficios a nivel individual e colectivo, tanto en termos de benestar como de eficiencia e sostibilidade”, apuntou.

Para reducir a sinistralidade, a conselleira de Traballo destacou a importancia de ter en conta as características propias de cada sector produtivo, posto que cada un deles esixe unha estratexia de prevención, saúde e seguridade diferenciada. Así, indicou que no sector da automoción é, por exemplo, se cabe máis importante, a coordinación en saúde e seguridade laboral, xa que é habitual que nun mesmo centro traballen empresas distintas e existan provedores exteriores.

Neste sector, ademais, é relevante o manexo de produtos químicos e o coñecemento sobre os riscos ergonómicos, dous ámbitos nos que, segundo lembrou Mato, o Instituto Galego de Seguridade e Saúde Laboral (ISSGA) ten diversas actuacións.

Por unha banda, a titular de Traballo recordou que a Xunta conta cun mapa de risco químico centrado en identificar os produtos perigosos e ou seu uso nas empresas galegas. Para realizar este documento, o Goberno galego contou coa colaboración de 180 empresas que operan en Galicia e que representan a 32.000 traballadores e traballadoras. Doutro lado, a Consellería está na actualidade a desenvolver o mapa de risco ergonómico no que se propoñen obxectivos directamente ligados co sector da automoción.

Estratexia de Seguridade e Saúde Laboral

Así mesmo, Mato indicou que para reducir a sinistralidade laboral, a Xunta está a elaborar nestes momentos o Plan Estratéxico de Seguridade e Saúde Laboral para o período 2015-2016, un documento que actualiza e inclúe todas as melloras que sexan necesarias para acadar este obxectivo. Nestes momentos, o borrador tense presentado aos axentes sociais e atópase en fase de alegacións. “O seu resultado final será froito do consenso e a concertación”, apuntou Mato.

O documento presenta importantes avances como a aposta pola redución dos trastornos musculoesqueléticos; incide nas actuacións de seguridade e saúde en pequenas e medianas empresas e microempresas; aposta polo reforzo da coordinación entre administracións; busca intensificar as actuacións con colectivos específicos como os mozos e mozas, traballadores e traballadoras de idade avanzada; mulleres embarazadas; persoas con discapacidade; ou persoas especialmente sensibles a determinados riscos; e, por último, o borrador da Estratexia pon acento no estudo dos riscos emerxentes e as súas causas. “En xeral contempla a necesidade de fomentar unha cultura da saúde e da prevención e a nosa intención é que esta Estratexia conte cunha revisión intermedia ao finalizar 2017”, sinalou.

Por último, Mato engadiu que grazas ao traballo conxunto das administracións, axentes sociais, empresas e traballadores a sinistralidade laboral estase a reducir como o demostran os datos de 2014 cando se rexistraron en Galicia menos da metade dos accidentes laborais que houbo no ano 2008. Estas cifras son similares ás rexistradas no sector da automoción, no que os accidentes diminuíron un 52 por cento desde 2009.

Actos do ISSGA

Con motivo mañá do Día Mundial da Seguridade e a Saúde no Traballo, que celebra a Organización Internacional do Traballo co fin de promover a prevención de accidentes laborais e enfermidades profesionais en todo o mundo, a Consellería de Traballo e Benestar organiza e participa esta semana en diversas actividades relacionadas con este evento, tanto nos seus centros como en colaboración con outras entidades. Así, entre outras actuacións, destaca mañá a celebración por parte do centro do ISSGA en Ourense de charlas sobre a importancia da cultura preventiva, que terán lugar no CIFP A Carballeira de Ourense; e no centro de formación profesional de Lourizán, o centro do ISSGA de Pontevedra organiza unha charla sobre o estado da seguridade e saúde laboral no sector forestal.