Aguilera destaca a aposta da adega Paco & Lola pola mellora da súa competitividade e pola internacionalización

O director xeral do Igape, Javier Aguilera, destacou hoxe na súa visita á adega cooperativa Paco & Lola o compromiso da mesma coa mellora da súa competitividade e, como consecuencia, os seus avances en mercados exteriores. Así, tal e como resaltou Aguilera, Paco & Lola está a incrementar a súa actividade e a súa internacionalización ao mesmo tempo. De feito, a súa facturación medrou preto dun 20% o ano pasado. Máis do 60% das súas vendas procede de mercados exteriores, entre os que cómpre salientar Estados Unidos, Holanda ou Reino Unido. Así, os produtos da adega están presentes en 40 países de catro continentes.

A adega está integrada por 428 cooperativistas que a converten, por número de socios, na principal sociedade cooperativa produtora de viños ao amparo da denominación de orixe Rías Baixas. A aposta da sociedade pola mellora da competitividade levouna a implantar un servizo de redefinición de modelo de negocio no marco do programa ReAcciona, impulsando tamén o desenvolvemento dunha nova liña de negocio on line, centrada na venda directa ao cliente final, e o desenvolvemento de presentacións exclusivas para a nova canle de venda directa.

Aguilera destacou que o Programa ReAcciona, que está aberto á presentación de solicitudes polas empresas, facilita servizos orientados a achegar novas competencias e habilidades ao capital humano das empresas, na procura de melloras consolidables na xestión das compañías.

Durante a súa visita a Paco & Lola, o director do Igape lembrou tamén a decidida aposta da Xunta pola mellora do tecido empresarial galego mediante a Axenda da Competitividade Industrial Galicia- Industria 4.0 que se está a consensuar, e co desenvolvemento da Estratexia de Internacionalización da Empresa galega 2020.