A inscrición no programa de termalismo social urbano de Vilagarcía para maiores remata o venres

A Área de Persoas Maiores con Concello de Vilagarcía advirte aos interesados de que o venres, 10 de abril, péchase o prazo de inscrición no Programa de Termalismo Social Urbano para persoas maiores. Aínda quedan prazas vacantes do total de 30 ofertadas polo departamento que dirixe Ángeles Rodríguez para a quenda de primavera que se desenvolverá do 15 de abril ao 15 de xuño.

O Programa de Termalismo Social Urbano dirixido a pensionistas de 55 anos en diante. Os beneficiarios poderán gozar de tres sesións semanais no SPA Arruyos del Agua durante dous meses por un prezo de 35 euros mensuais. Nas sesións, poderán facer uso de todos os circuítos do SPA emprazado na Avenida Rodrigo de Mendoza.

Na quenda de outono poderán participar outras 30 persoas. O prazo de inscrición abrirase tras o verán. Neste grupo terán prioridade aquelas persoas que non participaran en primavera.

O Termalismo Social Urbano é un dos programas municipais máis demandados polo colectivo de Persoas Maiores. O seu obxectivo é facilitar que estas persoas poidan acceder a circuítos termais e demais servizos do SPA como un medio de mellorar a súa calidade de vida e benestar. Ademais dos beneficios terapéuticos e relaxantes, o programa ofrece a avantaxa de que se presta no municipio, no centro da cidade, polo que os usuarios non teñen que desprazarse ata outras localidades.

Pensionistas e persoas en situación de respiro familiar

Os requisitos para poder acceder a este programa son estar empadroado en Vilagarcía, ser maior de 65 anos ou ter 55 anos cumpridos e estar xubilado, pertencer a outro grupo doutros pensionistas do Sistema Público de Pensións. Tamén se permitirá participar ás persoas que aínda non cumprindo os requisitos antes mencionados, sexan recomendados a través des Servizos Sociais Municipais como “situación de respiro familiar”. Ademais, os beneficiarios non padecer ningunha enfermidade ou patoloxía incompatible coa actividade do programa, e estar en condicións de total autonomía persoal.

As 30 prazas dispoñibles cubriranse por orde no Rexistro de Entrega das solicitudes. Os formularios de inscrición deben recollerse no departamento de Persoas Maiores e entregarse cubertos, no Rexistro Xeral do Concello dentro do prazo estipulado e en horario de 9 a 14 horas.