A Deputación destina 220.000 euros á promoción turística da Coruña e Santiago

A Deputación da Coruña vén de aprobar no pleno provincial dous convenios de colaboración para fomentar o turismo nas cidades da Coruña e Santiago. No primeiro caso, o Consorcio de Turismo e Congresos da Coruña recibirá 105.000 euros (o 80% do total) para o seu Plan de Competitividade Turística do ano 2015. Neste programa se incluirán todo tipo de actividades encamiñadas á promoción e dinamización da cidade como as campañas de comercialización online desenvolvidas durante a Semana Santa, as festas de San Xoán o concurso de tapas Picadillo ou o evento Chococoruña Cascarilla e Chocolate, ademais doutras accións dirixidas a segmentos concretos.

Con este proxecto, cuxo orzamento total é de 131.250 euros, se pretende consolidar á cidade da Coruña, así como a toda a provincia, como un destino de calidade durante todo o ano.

O mesmo obxectivo persegue o Plan de Competitividade Turística de Santiago. Neste caso a achega provincial tamén será do 80% do orzamento total, que suma 143.750 euros. Polo tanto, a Deputación achegará 115.000 euros á empresa municipal de Información e Comunicación Local Incolsa.

Neste caso se financian os gastos das feiras de turismo e gastronómicas, workshops e outras actuacións como o Santiago de Compostela Film Commission. Ademais, tamén se inclúe neste proxecto o servizo de acollida e atención ao visitante, as accións de comunicación e o custe do espazo web, así como estudos de análise turística (recollida, análise e tratamento de datos).