A Deputación de Pontevedra apoia á Sociedade Deportiva Samertolameu

A deputada Begoña Estévez entregoulles esta mañá unha axuda de 12.000 euros ós responsables do club, co fin de facilitar a participación do equipo en competicións oficiais. Os dirixentes do club agradeceron a axuda da Deputación, “especialmente porque cumpriron o compromiso que nos deron o pasado mes de decembro”, na xuntanza celebrada co resto de equipos da provincia.

De acordo cos compromisos adoptados pola Deputación nesas xuntanzas cos clubs, facilitaríaselles a adquisición de pneumáticas e chalecos salvavidas, “un material que se repartirá a partir do próximo mes de maio”, segundo asegurou a deputada Begoña Estévez.

Na actualidade a Sociedade Deportiva Samertolameu conta con equipos de vela, piragüismo e remo; ademais acaba de organizar o Campionato de España de bateis, tamén financiado pola Deputación de Pontevedra. A pasada fin de semana o peirao de Meira foi o centro de operacións do LXXII Campionato de España, no que as mellores embarcacións de Galicia, Asturias, Cantabria e País Vasco loitaron pola bandeira que os acredita como campións nacionais; máis de 450 deportistas, dos 70 clubs participantes, ateigaron a comarca do Morrazo durante os días da competición.