Teo edita un libro sobre a memoria da feira do San Martiño de Francos

O Concello de Teo edita un libro sobre a memoria da feira cabalar do San Martiño en Francos. Esta edición, que recolle unha parte de memoria oral e outra de notas históricas, preséntase mañá na escola de Francos ás 20:00 horas. Cada asistente recibirá un exemplar da publicación.

O acto contará coa presenza dos participantes na mesa redonda sobre a feira nas décadas dos anos 30 e 40, celebrada en novembro do 2014 en Francos María Calo, Antonio Castro e José María Fariña. Esta conversa transcribiuse integramente e aparece recollida no libro. Estes veciños estarán acompañados do concelleiro de Participación Veciñal e tamén veciño da zona, Ignacio Iglesias.

Esta edición ademais recolle unha parte de notas históricas, grazas ao traballo de Mercedes Vázquez Bertomeu, doutora en Historia. Nesta parte faise unha análise e recuperación histórica de elementos relacionados coa feira cabalar de Francos que vai dende a orixe, o lugar de celebración ou as implicacións económicas para a zona.

O acto pecharase coa actuación do grupo Puntada sen fío.