Seis equipos participan no Torneo de Natación do Lázaro 2015

O Servizo de Deportes do Concello de Verín organiza, con motivo da Feira do Lázaro e Certame Gastronómico ‘Vila de Verín’ 2015, un Torneo de Natación o 21 de marzo, a partir das 10 horas, na Piscina Climatizada de Verín.

Nesta edición, e por primeira vez, serán seis os equipos participantes neste torneo deportivo. Os mesmos proceden de diversos puntos da provincia e do norte de Portugal: Piscina Climatizada de Allariz, Clube Nataçâo Chaves, Piscina Climatizada de Xinzo de Limia, Flavitus Nataçâo Clube, Serviocio Ourense e Club de Natación de Verín.

A convocatoria vai dirixida a nadadores de ambos sexos, sen licenza federativa en vigor, que competirán na categoría de prebenxamín (nados/as nos anos 2007 e 2008), benxamín (nados/as nos anos 2005 e 2006), alevín (nados/as nos anos 2003 e 2004), infantil (nados/as nos anos 2001 e 2002), e cadete (nados/as nos anos 1999 e 2000); e nas seguintes probas: costas, croll, braza e relevos.

Este evento está organizado polo Concello de Verín e patrocinado por: Eurocidade Chaves-Verín AECT, Plan de Competitividade Turística Puertas de Galicia, Inorde, Deputación Provincial, Xunta de Galicia, Gadis, Cabreiroá, Construcciones Hnos. Carrajo, D.O. Monterrei, Socitransa, Parador de Verín, Vipeca, Aceites Abril, Pirotecnia Xaraiva, La Caixa, Caja Rural de Zamora, Estradas Galegas SL, MRW, Esinor, AEVER-CCU Verín e AEHCOM.