Renóvanse as travesas da pérgola do parque dos Condes

A concellería de Medio Ambiente comezará esta tarde os traballos de renovación das travesas de madeira da pérgola do parque dos Condes. Esta actuación lévase a cabo debido ó deterioro das travesas da pérgola que separa o parque da zona de estacionamento de vehículos, e será efectuada pola empresa monfortina A Campiña.

Os traballos, cun custo de 18.699 euros, consistirán na retirada das travesas e da alambrada actual, así como da instalación de cables eléctricos e das luminarias existentes na citada pérgola para, a continuación, instalar travesas e alambrada novas e devolver ó seu estado orixinal a instalación eléctrica.

A obra realízase no momento en que as glicinias que cubren a pérgola están podadas e antes de que as mesmas comecen a brotar.

Con motivo da execución destas obras, financiadas na súa totalidade pola concellería de Medio Ambiente, limitarase tanto o estacionamento de vehículos nas proximidades da pérgola como o paso dos peóns por baixo da mesma. Estas limitacións efectuaranse por tramos, segundo avancen as obras, e afectarán a espazos reducidos nos que caberían oito ou dez vehículos.