Pescamar converte ao MVP Maxi Kleber en 45 quilos de conserva para os máis necesitados

Maxi Kleber

Ser MVP da Xornada ou estar incluído dentro do Quinteto Idea da Xornada da liga Endesa terá a partir de agora, un aliciente máis para os xogadores do Rio Natura Monbus Obradoiro. E é que, o Grupo Pescamar, membro do Club de Empresas Obradoiro, doará a valoración do xogador agraciado a diferentes entidades solidarias galegas convertida en quilos de latas de conserva.

Maxi Kleber, MVP da pasada Xornada con 45 de valoración, foi o primeiro en recoller as súas latas solidarias, que nesta ocasión, irán destinadas ao Banco de Alimentos de Pontevedra: “Desde logo, é unha maneira moi orixinal de axudar e reconforta aínda máis o logro” . “Esforzarémonos máis se é posible para que a liga Endesa nos inclúa e poder estar cada semana uno de nós e así conseguir moita cantidade”, chanceaba o á-pivote alemán.

Lupe Murillo, directora de Pescamar e conselleira do club, declarou “satisfación por comezar esta nova iniciativa co club. En Pescamar gústanos estar ao lado de quen o necesita, e esta acción é unha maneira máis de facelo, sumándoo como un valor engadido á nosa paixón polo baloncesto”. Ademais, “comezar xa cun MVP nesta xornada é un gran sinal, significa que as cousas foron ben na pista. Oxalá teñamos que doar moitísimas latas cada semana”.