Persoal de AENA e BNG denuncian deficiencias no aeroporto de Santiago

O BNG e persoal de AENA denunciaron este venres “deficiencias” organizativas e estruturais no aeroporto de Santiago. En concreto, ambos os dous mantiveron esta mañá unha reunión. Desta forma, a deputada do Bloque no Congreso Rosana Pérez cargou contra as “goteiras” que sofre a nova terminal do aeroporto de Lavacolla. “Non é de recibo que, despois de gastar máis de 230 millóns de euros nesta nova terminal, esteamos a aguantar goteiras”, resolveu a parlamentaria do BNG.

A este respecto, Pablo de Prado, da sección sindical da CIG en AENA, asegurou que “despois de moitas reclamacións””segue habendo goteiras que seguen sin arranxarse”.

Na liña das “deficiencias”, o voceiro e candidato do BNG ao Concello de Santiago, Rubén Cela, denunciou, tras falar con traballadores de AENA, que hai “problemas de visibilidade” de “partes do aeroporto” na “nova torre de control”.

Neste sentido, Rosana Pérez subliñou que as “deficiencias” existentes responden á “política de infraestruturas” que “se levou a cabo sen ningún tipo de control”.

No que respecta ás “deficiencias organizativas”, Pablo de Prado precisou que, cada vez que hai dous avións internacionais, “colapsa o aeroporto”.

“Tanto se fala de que este aeroporto é un aeroporto internacional, de que hai que potenciar este aeroporto e, non obstante aquí, cada vez que temos dous avións internacionais, colapsa o aeroporto”, denunciou.

A este respecto, Héctor Rodríguez, delegado de CC.OO., explicou que os pasaxeiros da Comunidade Económica Europea e os de países asinantes do Acordo Schengen “non se “poden xuntar” por “cuestión de pasaportes”.

PRIVATIZACIÓN AENA

Nesta reunión, os políticos do Bloque e os sindicatos de AENA tamén falaron sobre a privatización de AENA. A este respecto, Rosana Pérez mostrou a súa “preocupación” polos dereitos laborais dos traballadores.

Así mesmo, a parlamentaria do Bloque quere saber “que vai pasar cos aeroportos que ese 49 por cento de investidores privados non consideren rendibles”. E é que sostén que estes atenden aos “beneficios” das súas empresas e non aos “intereses de cohesión territorial e social”.

“Creo que coincidimos todos en que a privatización de AENA é unha repartición de beneficios entre uns amiguetes”, subliñou Pablo de Prado, da CIG. A este respecto, cargou contra a privatización do “parking” e do “servizo de mantemento”.

Pola súa banda, Cela púxolle un “suspenso” ao presidente da Xunta, Alberto Núñez Feijóo, e ao alcalde de Santiago e exconselleiro de Medio, Territorio e Infraestruturas, Agustín Hernández, en relación á política aeroportuaria galega.

Neste sentido, fixo fincapé na necesidade de buscar “coordinación e especialización” entre os tres aeroportos galegos e non competencia entre alcaldes”, que, na súa opinión, “tiran de chequera” baixo “intereses localistas”.

COMPARACIÓN CO AEROPORTO DE OPORTO

De igual modo, o voceiro do Bloque na Casa do concello compostelano comparou os “datos espectaculares” do aeroporto de Oporto coa “perda de pasaxeiros” nos aeroportos galegos. Por iso, pediu á Xunta que “tome en serio” este tema.

Así mesmo, criticou a “ocorrencia” de Hernández por “dicir que se debía facer un albergue de peregrinos” na vella terminal do aeroporto de Lavacolla.