Os equipos de fútbol base do Celta e o Deportivo compartirán autobús

O Real Club Celta e o Deportivo da Coruña dan un novo paso adiante no seu firme compromiso por forxar unha relación fluída e cordial entre as dúas entidades, que camiñan de xeito decidido cara ao establecemento definitivo dunha sa rivalidade deportiva. Ambos os dous clubs, nun exemplo de colaboración de elevado contido simbólico, ofrecerán esta próxima Semana Santa unha imaxe de gran valor: a dos xogadores de varios equipos de categorías inferiores compartindo autobús. Unha vez no terreo de xogo, a paixón, a tensión e a enerxía serán as que tradicionalmente desprenden os derbys, xogados e vividos coa máxima intensidade, pero tamén co máximo respecto.

Concretamente, os equipos Cadete A e Benxamín A de Celta e Deportivo viaxarán xuntos esta Semana Santa. Os cadetes desprazaranse a Zaragoza para participar no prestixioso torneo César Augusta, no que comparten cartel con equipos como Real Madrid ou Fútbol Club Barcelona. Este torneo terá lugar entre os días dous e cinco do próximo mes de abril.

Pola súa banda, os equipos do Benxamín A de Celta e Deportivo desprazaranse no mesmo autobús a Iscar, en Valladolid para participar na Iscar Cup, trofeo de enorme nivel no que os céltico comparten grupo con equipos como Real Madrid, Barcelona ou Villarreal. A fase de grupos na que participan os céltico terá lugar os días 2 e 3 de abril.

A imaxe dos nenos dos dous equipos galegos emprendendo unha viaxe xuntos simboliza o camiño que deben completar tamén ambas as dúas afeccións cara á normalidade e o comportamento deportivo nos enfrontamentos entre os dous clubs. A rivalidade deportiva será sempre intensa e chea de paixón, con ambas as dúas afeccións envorcadas coa máxima enerxía en animar os seus equipos pero, sen minguar os sentimentos que rodean ao derby, a normalidade debe converterse no verdadeiro sinal de identidade dos partidos que disputen ambos os dous equipos.