O XV Salón Motorocasión abre con 700 modelos de automóbiles e motos usados e de ocasión

Vista do Salón Motorocasión

O XV Salón Motorocasión abrirá dende este xoves e ata o domingo cuns 700 modelos de preto de medio centenar de marcas de automóbiles e motocicletas, que se exhibirán en dous dos pavillóns do Instituto Feiral de Vigo (Ifevi).

Con 17.000 metros cadrados de superficie, a que é “a maior feira do noroeste de España en superficie e oferta de unidades á venda” do vehículo usado e de ocasión ofrecerá durante os próximos catro días dende vehículos de alta gama ata utilitarios urbanos “por prezos moi rebaixados”.

Así, os interesados poderán adquirir vehículos de segunda man, de quilómetro cero, modelos de redeseñar recente, de renovación de gama ou con tempo en ‘stock’. Ademais, nos stands de motocicletas tamén haberá unha “ampla oferta” de modelos, dende motos de carreiras, ata scooters, sport, touring, raid e outros tipos.

A organización sinalou que cada marca disporá de asesores que atenderán aos visitantes, e, ao ser concesionarios oficiais, se ofrecerán todas as “garantías, prestixio e experiencia”, ademais de polo menos un ano de garantía nos vehículos.

No relativo a actividades paralelas, este ano tamén se manterán expositores da industria auxiliar e complementarios ligados ao mundo do motor, e haberá unha pista de ‘slot’ -os catro días- e un simulador de condución -a fin de semana-.

O salón estará aberto ao público de 16,00 a 21,00 horas xoves e venres e de 11,00 a 21,00 horas o sábado e domingo. O prezo da entrada será de catro euros, sendo gratuíto para os menores de 10 anos e para aqueles que conserven a súa entrada ao Salón do Automóbil e Motocicleta de Vigo, celebrado a semana pasada.