O veciño da Coruña falecido no sinistro aéreo tiña previsto trasladarse a vivir a Alemaña

Josep Sabaté Casellas, veciño da Coruña e natural de Sabadell (Barcelona), tiña previsto trasladarse a vivir a Alemaña, segundo sinalou un coñecido, co que compartía a súa afección ao fútbol e que coincidían tamén en actividades nas que participan os seus respectivos fillos.

En declaracións aos xornalistas, Rodrigo Cuesta, que compartiu nas últimas datas co falecido un dos aniversarios dos seus fillos, mostrábase consternado polo sucedido. “Era un gran pai, moi bo, un gran home”, resumiu.

Este veciño, residente nunha urbanización de Culleredo (A Coruña), explicou que Josep Sabaté trasladouse, desde Carral, a vivir a outro chalé situado na contorna da Zapateira, onde se sitúan urbanizacións nunha contorna próxima á cidade herculina.

Tamén explicou que, como provedor de produtos infantís, traballara con Sabaté Casellas cando este era responsable da área de Seguridade e Produtos en Zara. “Decateime polas noticias e por amigos”, sinalou Rodrigo Cuesta, sobre o accidente.

“QUERÍAO TODO O MUNDO”

Ademais, precisou que Josep Sabaté tiña unha semana de vacacións; pero collera o voo para arranxar unhas cuestións de traballo. Mentres, a súa muller se atopaba en Barcelona á espera de dar a luz ao cuarto fillo da parella.

Sobre o falecido, subliñou que o quería todo o mundo”. “Facíase querer rápido”, apostilou tras remarcar que era “un bo pai” e que, sempre que o seu traballo llo permitía, trataba de acudir ás actividades dos seus fillos.

Ademais, dixo que o falecido “tiña pensado irse a Alemaña”, país no que ten a súa sede a firma téxtil Esprit para a que traballaba desde facía nove meses tras o seu paso pola compañía Inditex.