O Partido Popular de Vigo rexistra unha nova solicitude de pleno extraordinario sobre o suposto ‘enchufe’ dunha familiar de Silva

O grupo municipal do PP entregou ao secretario municipal este mércores unha nova solicitude para a celebración dun pleno extraordinario no que o alcalde, Abel Caballero, “dea explicacións” sobre o proceso xudicial que investiga o suposto enchufe dunha familiar de Carmela Silva, e no marco do cal hai catro imputados (a cuñada do tenente de alcalde, un xefe de servizo do Concello, o actual interventor e o seu antecesor).

Despois de que a súa primeira petición fose rexeitada cun informe negativo do secretario, o PP fixo, segundo o concelleiro Miguel Fidalgo, “un exercicio de concreción”, e presentou un texto no que se reclama ao goberno encabezado por Caballero que aclare os criterios de contratación de persoal na concesionaria que prestaba servizo aos centros cívicos e os mecanismos de control para garantir o cumprimento do prego de condicións.

Fidalgo explicou que, aínda que o seu grupo non descarta recorrer a denegación da primeira solicitude, decidiu facer un segundo intento, xa que o regulamento do pleno o permite. “O alcalde non pode manter que non hai nada que dicir. Se non hai nada que ocultar, que o diga, pero nós pedimos o que está a demandar a rúa, que quere saber que pasa coas contratacións”, concluíu o edil.

Tras a presentación da solicitude, o alcalde ten catro días hábiles para convocar a sesión extraordinaria (se procede esa convocatoria) e, a partir de aí, ábrese un prazo de 15 días para a celebración dese pleno.

SOLICITUDE DENEGADA

A primeira solicitude do PP foi denegada tras a emisión dun informe do secretario, alegando que o goberno municipal non pode esixir “responsabilidades” pola imputación de tres funcionarios (tal e como pedía o PP no seu escrito) porque “non existen responsabilidades que se poidan esixir”.

Así, o secretario recordaba que hai un procedemento xudicial aberto, no marco do cal citouse a 4 persoas como imputadas e “nada, absolutamente nada, pode facer o goberno local -salvo colaborar coa Xustiza– para evitar un escenario de instrución nunhas dilixencias previas”, e mesmo o PP, coa súa solicitude, podería incorrer nun “exercicio abusivo do dereito”.

A ese respecto, o informe reflectía que a proposta de acordo era “de contido imposible material e xurídico, pois o feito de que tales funcionarios interviñesen na tramitación duns expedientes administrativos que son obxecto de investigación, e haxan citados a declarar como imputados (…) non xera responsabilidade de ningún tipo”. Por iso, insistía, un acordo nese sentido sería “nulo de pleno dereito”.

Con estes argumentos e “ante o escenario dun debate en sesión pública inútil e inquisitivo, con indefensión e prexuízo a terceiros”, o secretario concluía que o alcalde debía ditar resolución rexeitando a devandita convocatoria, como así fixo.